सुनसरी- टोल तथा सुरक्षा समिति गठन गरी शुद्ध खानेपानी उपलब्ध गराउने कार्यको थालनी भएको छ।
बराहक्षेत्र नगरपालिका-१ स्थित चतराघाट (कोशी पुल)मा खानेपानी समस्या भएपछि वडाध्यक्ष किसान थापा मगरको पहलमा तोरीबारी खानेपानी तथा सरसफाइ उपभोक्ता समितिको सहकार्यमा टोल तथा सुरक्षा समिति गठन गरी शुद्ध पानी उपलब्ध गराइएको हो।
समितिमा संयोजक खड्ग पौडेल, सचिव रमेश कार्की, सुमित्रा कायस्थ, सरिता श्रेष्ठ, राजकुमार कटुवाल छन्।
तोरीबारी खानेपानी तथा सरसफाइ उपभोक्ता समितिका अध्यक्ष डम्बर सिग्देलका अनुसार चतरा घाटमा खानेपानी समस्या रहेकामा वडा नम्बर १ का अध्यक्ष किसन थापा मगरको पहलमा शुद्ध खानेपानी उपलब्ध गराउन थालिएको हो।
टोल तथा सुरक्षा समिति सचिव रमेश कार्कीका अनुसार वडाध्यक्ष मगर, वडा सदस्य कुमार भट्टराई, तोरीबारी खानेपानीका अध्यक्ष सिग्देल, उपाध्यक्ष राजु कार्की, सचिव दीपक कोइराला, मोहनबहादुर बस्नेत, विनोद गुरागाईं, गोपादेवी न्यौपाने, विना राईलगायतले त्यसका लागि सहयोग गरेका थिए। उनीहरू सबैलाई शुद्ध खानेपानी उपलब्ध गराउन सहयोग, सहकार्य गरेकामा सचिव कार्कीले धन्यवाद ज्ञापन गरे।
पर्यटकीय क्षेत्रको रूपमा विकास भइरहेको चतराघाटका ४० घरपरिवारले खानेपानी समस्या भोग्दै आएका थिए। सशुल्क खानेपानी पाउने भएपछि स्थानीय बासिन्दा तथा होटल व्यवसायी हर्षित भएका छन्।