काठमाडौं- बेमौसमी वर्षाका कारण देशभर आएको बाढी पहिरोबाट मृत्यु भएका परिवारलाई प्रतिपरिवार एकजनाको मृत्यु भएको भए दुई लाख र त्यसभन्दा बढीको मृत्यु भए प्रतिमृतक एक लाखका दरले थप सहयोग गर्ने निर्णय गरेको छ ।

घर, खाद्यान्नसमेत नष्ट भई अलपत्र परेका पाँचजनाको परिवारलाई जनही १५ हजार र त्यसभन्दा बढी सदस्य रहेका परिवारलाई जनही २० हजार रुपैयाँका दरले राहत उपलब्ध गराउने निर्णय पनि बुधबारको मन्त्रिपरिषद् बैठकले गरेको छ ।

घाइतेको उपचारको सबै व्यवस्था सरकारले मिलाउने भएको छ । विपदबाट भएको क्षतिको आकलन गरी सबै मन्त्रालयले यथाशीघ्र प्रतिवेदन पेश गर्ने निर्णय पनि मन्त्रिपरिषदको छ ।

सडकलगायत महत्त्वपूर्ण संरचना तत्काल मर्मत गरी सञ्चालनमा ल्याउने निर्णय पनि सरकारले गरेको सञ्चार तथा सूचना प्रविधि मन्त्री ज्ञानेन्द्र कार्कीले जानकारी दिए ।