काठमाडौं– राउण्ड टेबल नेपालले देशभरका सरकारी विद्यालयमा अध्यनरत एक हजार विपन्न विद्यार्थीलाई छात्रवृत्ति प्रदान गर्ने भएको छ ।
आज रिपोर्टर्स क्लब नेपालमा पत्रकार सम्मेलन गरी राउण्ड टेबल नेपालले शैक्षिक उत्कृष्टता र वित्तीय आवश्यकताका आधारमा एक हजार विद्यार्थीलाई छात्रवृत्ति प्रदान गर्न लागिएको जानकारी गराएको हो ।
‘गरिबीको चक्र तोड्ने र सबैका लागि उज्यालो भविष्य निर्माण गर्ने मुख्य कारक शिक्षा हो’ भन्ने मूल–मान्यताका साथ आफूहरुले शिक्षा क्षेत्रलाई प्राथमिकता दिएर काम गरिरहेको राउन्ड टेबल नेपालका अध्यक्ष राहुल अग्रवालले बताए ।
‘हामी यो छात्रवृत्ति कार्यक्रम घोषणा गर्न पाउँदा गर्व गर्छौं । जसले नेपालभरका योग्य विद्यार्थीहरूलाई उनीहरूको शिक्षा जारी राख्न र सपनाहरू प्राप्त गर्न मद्दत गर्नेछ । हामी विश्वास गर्छौं कि शिक्षा मौलिक अधिकार हो, र हामी यसलाई सकेसम्म धेरै विद्यार्थीहरूको लागि पहुँचयोग्य बनाउन प्रतिबद्ध छौं,’– अध्यक्ष अग्रवालले भने ।
राउण्ड टेवलको नेपालभरी साढे पाँच सय भन्दा बढि सदस्य छन् । ३० वर्ष लामो इतिहास बोकेको सस्थाले स्वास्थ्य सँगै शिक्षा क्षेत्रमा पनि काम गरिरहेको छ ।
छात्रवृत्ति कार्यक्रम यही बैशाख १३ गते बुधबार देशभर र काठमाडौंको जुनकिरी पब्लिक स्कुल, साँखुको शंखरापुर–७ बाट सुरु हुने साहिल अग्रवालले बताए ।