काठमाडौं– राष्ट्रिय जनमोर्चाले एमसीसीविरुद्ध २२ भदौमा देशव्यापी सांकेतिक विरोध प्रदर्शन गर्ने भएको छ । एमसीसी इन्डोप्यासिफिक रणनीतिको अंग भएको भन्दै जनमोर्चाले यसलाई कुनै हालतमा अनुमोदन गर्न नहुने बताएको छ ।

आइतबार प्रेस विज्ञप्ति जारी गर्दै जनमोर्चा अध्यक्ष चित्रबहादुर केसीले गठबन्धन सरकारले न्यूनतम कार्यक्रममा एमसीसी समावेश नगरेको भए पनि केही दिनयताका गतिविधिले एमसीसीलाई पारित गराउन चलखेल हुन थालेको उल्लेख गरेका छन् ।

‘एमसीसी वा यस्तै गम्भीर प्रकृतिका र विवादास्पद विषय सरकारले यो अवधिमा नउठाउने एक प्रकारको भद्र सहमति हो । तर, केही दिनयता राष्ट्रिय जनमोर्चाबाहेकका गठबन्धन दलबीच एमसीसीबारे छलफल भएको, एमसीसीको विज्ञापन प्रसारण भएको, एमसीए अमेरिकाका उपाध्यक्ष चाँडै नेपाल आउने, अमेरिकाले एमसीसीलाई संसदबाट पारित गराउन दिएको दबाब र चर्चाले एमसीसीलाई पारित गर्न चलखेल भएको सहजै अनुमान गर्न सकिन्छ,’ विज्ञप्तिमा उल्लेख छ ।