काठमाडौं- क्रियाशील सदस्यता छानविनको विषयलाई लिएर केन्द्रीय सदस्य श्यामकुमार घिमिरेमाथि हातपात भएपछि कांग्रेसको क्रियाशील सदस्यता छानविनको काम रोकिएको छ। शुक्रबार समितिका सदस्यसमेत रहेका नेता घिमिरेबाट सिन्धुपाल्चोकका क्षेत्रीय सभापति बालकृष्ण बस्नेतलगायतले गालीगलौज र दुर्व्यवहार गरेका थिए।

छानविन समितिले सो घटनालाई लिएर त्यसपछि छानविनका सबै काम रोकेको छ। घटनाका दोषीलाई कारवाही नभएसम्म क्रियाशील छानविनको कामै नगर्ने समितिको अडानपछि कांग्रेस सभापति शेरबहादुर देउवाले शनिबार अपराह्न पदाधिकारी र पूर्वपदाधिकारीको बैठक बोलाएर सो विषयलाई समाधानको प्रयास गरेका छन् । तर, शनिबार साँझसम्म पनि छानविन समितिले काम सूरु गरेको छैन।

‘दोषीलाई कारवाही नभएसम्म हामी काम गर्दैनौँ। हामी रातदिन खटिएर काम गर्ने, अन्ततः हाम्रै जीवन जोखिममा पर्ने कुरा सामान्य हुनै सक्दैन,’ छानविन समितिका एक सदस्यले भने।

शुक्रबारको घटनापछि छानविन समितिले तत्कालै काम रोकेको, तर बाहिर हल्ला नगरेको स्रोतको दाबी छ। छानविन समितिले पार्टीको महाधिवेशन प्रभावित हुने सन्देश नजाओस् भनेर बाहिर हल्ला नगरे पनि पार्टीका नेताहरूलाई भने छानविन समितिमाथि भएको हातपातको घटनामा छानविन गरी दोषीलाई कारवाही नभएसम्म काम अघि नबढाउने चेतावनी दिएको थियो।

शुक्रबार बालुवाटारमा पदाधिकारी बैठक चलिरहेकै बेला गौशालास्थित नेपाल-भारत मैत्री धर्मशालामा केन्द्रीय सदस्य घिमिरेमाथि आक्रमण भयो। त्यसबारे बैठकमा छलफल भए पनि ठोस निर्णय भएन। प्रवक्ता विश्वप्रकाश शर्माले विज्ञप्ति जारी गरेर निन्दा व्यक्त गर्दै त्यस्तो अनैतिक कार्य स्वीकार्य नहुने बताए। तर, छानविन समिति सदस्यहरूले पार्टीको जिम्मेवारी पूरा गर्ने क्रममा केन्द्रीय सदस्यको ज्यानै जोखिममा पर्ने गरी देखिएका घटनालाई लिएर सिरियस नभएको भन्दै कारवाही नभएसम्म काम रोक्ने अडान लिएपछि देउवाले आकस्मिक बैठक बोलाएका थिए।

बालुवाटारमा बसेको बैठकले घिमिरेमाथि भएको हातपातका विषयमा छानविन गरी दोषीउपर कारवाहीका लागि अनुशासन समितिलाई निर्देशन दिएको छ। घिमिरेमाथि आक्रमण गर्नेमध्ये सिन्धुपाल्चोकको क्षेत्र नं. १ का सभापति बालकृष्ण बस्नेतसमेत छन्। बैठकले २४ घण्टाभित्र स्पष्टीकरण लिएर पार्टी विधानबमोजिम तीन दिनभित्र कारवाहीको टुंगो लगाउन अनुशासन समितिलाई निर्देशन दिएको छ।