काठमाडौं- अविरल वर्षाको कारण देशका विभिन्न स्थानमा बाढी पहिरो र डुबानमा परी २० जेठदेखि २२ असारसम्ममा ४४ जनाको मृत्यु भएको छ।

प्रहरीका अनुसार मृत्यु हुनेहरूमा २४ पुरुष, १३ जना महिला, सात बालबालिका छन्। तीमध्ये सिन्धुपाल्चोकमा पाँच, डोटीमा चार, रोल्पा र गोरखामा ३-३ जना, चितवन, तनहुँ, प्युठान, धादिङ, म्याग्दी, दाङ र रौतहटमा २-२, ललितपुर, मकवानपुर, सर्लाही, खोटाङ, सप्तरी, काभ्रे, सिन्धुली, जुम्ला, अर्घाखाँची, पाल्पा, कास्की, कालिकोट, पाँचथर, बझाङ र बाजुरामा १-१ जना छन्।

पछिल्लो २४ घण्टामा म्याग्दी मंगला गाउँपालिका-५ छिस्बाङस्थित थमबहादुर बुढाथोकीको घर बाढीले भत्किँदा सोही घरमा पसल गरी बस्ने मालिका गाउँपालिका-६ दुखु घर भएका २३ वर्षीय गजिन रोका र उनकी श्रीमती १९ वर्षीया विना रोकाको मृत्यु भएको छ।

बाढीपहिरो र डुबानमा परी उक्त अवधिमा ६० जना घाइते भएका छन्। तीमध्ये ३२ पुरुष, १४ महिला, १४ बालबालिका छन्। उनीहरूमध्ये तनहुँमा १०, धादिङमा ६, सिन्धुपाल्चोक र रोल्पामा ५-५, धनुषा र सर्लाहीमा ४-४, खोटाङ, कास्की, म्याग्दी र डोटीमा ३-३, जुम्ला, चितवन र गोरखामा २-२, पाँचथर, रौतहट, स्याङ्जा, हुम्ला, अछाम, दार्चुला, बाजुरा र सल्यानमा १-१ जना छन्। घाइतेहरूको स्थानीय अस्पतालमा उपचार भएको छ।

बाढी पहिरोमा परी २७ जना बेपत्ता भएका छन्। तीमध्ये १७ पुरुष, ६ महिला र चार बालबालिका छन्। उनीहरूमध्ये सिन्धुपाल्चोकमा २०, चितवनमा तीन, पर्वतमा दुई तथा बाजुरा र बाग्लुङमा १-१ जना छन्। बेपत्ताको खोजी जारी छ।

यसैगरी, बाढी पहिरोमा परेका एक हजार दुई सय ५० जनाको विभिन्न ठाउँबाट उद्धार गरिएको प्रहरीले जनाएको छ। उद्धार गरिएकामध्ये मनाङमा ६ सय ५६, चितवनमा चार सय दुई, सिन्धुपाल्चोकमा एक सय २३, दोलखामा ३५, लमजुङ र सल्यानबाट ८-८, जाजरकोटमा सात, गोरखा र दाङमा ४-४ र कञ्चनपुरमा तीनजना छन्। उद्धारपछि उनीहरूलाई तत्काल उपचारका लागि विभिन्न अस्पतालमा लगिएको थियो।

प्रहरीका अनुसार बाढी पहिरोका कारण अवरोध भएका विभिन्न स्थानका सडक प्रहरीसमेतको पहलमा सञ्चालनमा ल्याइएको छ। साथै, वर्षाका कारण रसुवा, मुस्ताङ, बाजुरा, सिन्धुपाल्चोक, पर्वत, म्याग्दी, बाग्लुङ, कास्कीलगायत जिल्लामा बुधबार पहिरो गई अवरोध भएका सडक पहिरो हटाई सञ्चालन प्रयास जारी छ।

बाढीका कारण एक हजार चार सय २८ वटा घर डुबानमा परेका छन्। पाँच सय ४५ वटा घर, ९७ वटा गोठ, ३९ वटा पुल, तीनवटा विद्यालय र १३ वटा सरकारी कार्यालयमा क्षति पुगेको छ। बाढीमा परी आठ सय ३६ वटा घरपालुवा चौपाया मरेका छन्।

उक्त अवधिमा भएका चार सय ९६ वटा विपद्का घटनाबाट एक हजार एक सय ५४ परिवारका पाँच हजार तीन सय ८५ जना विस्थापित भएका छन्।