काठमाडौं- गण्डकीका नवनियुक्त मुख्यमन्त्री कृष्णचन्द्र नेपाली प्रजातन्त्र सेनानी गोवर्धन पोखरेलका माइला छोरा हुन्।
उनी २००६ सालमा तनहुँ (हाल व्यास नगरपालिका–११) मा जन्मेका हुन्। उनका पिता गोवर्धन पोखरेल कांग्रेस तनहुँका संस्थापक नेता हुन्। राणा शासनविरुद्ध आन्दोलनमा लागेकाले उनको परिवारको सर्वश्व हरण भएको थियो।
गत आम निर्वाचनमा उनी नवलपरासी-१ ‘क’बाट निर्वाचित भएका थिए। ०४८ सालपछि झण्डै दुई दशक उनी नवलपरासी कांग्रेसका सभापति भएका थिए। त्यसपछि गण्डकी प्रदेशभामा कांग्रेस संसदीय दलको नेता भएका थिए।
१२ औँ महाधिवेशनबाट उनी कांग्रेस केन्द्रीय सदस्य पनि निर्वाचित भएका थिए।
उनका दाइ रामचन्द्र पोखरेल कांग्रेस केन्द्रीय कार्यालयमा मुख्यसचिव पनि भएका थिए। उनका भाइ जगदीशचन्द्र पोखरेल राष्टिय योजना आयोगका पूर्वउपाध्यक्ष हुन्। कान्छा भाइ सुवासचन्द्र पोखरेल भने अमेरिकामा बस्छन्।
उनी कांग्रेसका १५, माओवादी केन्द्रका ११, जसपाका दुई, जनमोर्चाका दुई र स्वतन्त्र सांसद राजीव गुरुङको समर्थनमा मुख्यमन्त्री बनेका हुन्। उक्त विपक्षी गठबन्धनले शुक्रबार नै प्रदेश प्रमुख सीताकुमारी पौडेलसमक्ष नयाँ सरकार गठनको प्रस्ताव गरेको थियो।
शनिबार अन्तिम समयमा आएर निवर्तमान मुख्यमन्त्री पृथ्वी सुब्बा गुरुङले पनि आफूले सरकार बनाउने दाबी पेश गरेका थिए। तर, उनको दाबी प्रदेश प्रमुख कार्यालयमा दर्ता नै भएन। उनको दाबीलगत्तै विपक्षी गठबन्धनका ३१ जना सांसद नै प्रदेश प्रमुख निवास अघिल्तिर धर्नामा बसेका थिए।
माओवादी केन्द्र, जसपा र स्वतन्त्र सांसद गुरुङलाई समेटेर मन्त्रिमण्डल गठनको तयारी भइरहेको छ। जनमोर्चाले भने सरकारबाहिरै रहने बताएको छ।