काठमाडौं- एमाले अध्यक्ष तथा प्रधानमन्त्री केपी ओलीले पार्टी एकताका लागि आह्वान गरेका छन्। ३ जेठभन्दा अगाडिका पार्टी कमिटी ब्युँताउन उनी तयार देखिएका छन्।

यही मागमा अडिग माधवकुमार नेपाल-झलनाथ खनाल समूहपार्टी विभाजनको दिशातर्फ उद्यत रहँदा ओलीले आइतबार राति पार्टी एकताका लागि आह्वान गरेका हुन्।

एकताका लागि उनले ६ बुँदाको प्रस्ताव अगाडि सारेका छन्। पहिलो बुँदामा ३ जेठ ०७५ भन्दा पूर्वको अवस्थामाबाट एमालेलाई अगाडि बढाइने उल्लेख छ। तत्कालीन नेकपाको केन्द्रीय कमिटीका सदस्यहरूमध्ये एकताको पक्षमा अभिएकाहरूलाई आधार मानेर केन्द्रीय कमिटी र स्थायी कमिटीका संरचना गतिशील हुने उल्लेख गरेका छन्।

दोस्रो बुँदामा मातहतका पार्टी कमिटी र जनसंगठनहरू मूलभूत रूपमा ३ जेठ ०७५ को पूर्वको अवस्थामा फर्केर क्रियाशील हुने बताएका छन्।

बुँदा नम्बर ३ मा संगठनात्मक क्षेत्रका ती निष्कर्षहरू कार्यान्वयन गर्ने क्रममा देखापर्ने समस्या समाधानका लागि कार्यदलले काम गर्ने उल्लेख गरेका छन्।

चौथो बुँदामा ओलीले भनेका छन्, ‘आफ्नो पार्टीका अध्यक्षलाई प्रधानमन्त्री पदबाट हटाई विपक्षी दलका नेतालाई प्रधानमन्त्री बनाइयोस् भन्ने मागसहित सर्वोच्च अदालतमा प्रस्तुत रिट निवेदनमा प्रयोग गरिएको एमालेका निवर्तमान सांसदहरूको हस्ताक्षर फिर्ता हुनेछ।’

पाँचौँ बुँदामा भनेका छन्, ‘यसबीचमा विभिन्न कमरेडहरूबाट भएका गल्ती तथा कमीकमजोरीलाई लिएर कुनै कारवाही गरिने छैन, पूर्वाग्रह राखिने छैन र कुनै भदभाव गरिने छैन।’

छैटौँ बुँदामा एमालेलाई वैचारिक, संगठनात्मक र भावनात्मक रूपले एकताबद्ध, अनुशासित र अझ सुदृढ बनाउने सबैको रचनात्मक सहयोग हुने अपेक्षा व्यक्त गरेका छन्।

योगेशको स्वागत

एमाले अध्यक्ष केपी ओलीले आइतबार राति पार्टी एकताका लागि गरेको आह्वानको सचिव योगेश भट्टराईले स्वागत गरेका छन्।

‘अध्यक्ष केपी शर्मा ओलीले एमालेको एकताका लागि आज सार्वजनिक वक्तव्यमार्फत गर्नुभएको आह्वान मुलतः सकारात्मक छ। कार्यदलस्तरको छलफललाई यो वक्तव्यले पुनः निरन्तरता दिन बाटो खुलेको छ,’ भट्टराईले आफ्नो फेसबुक पेजमा लेखेका छन्, ‘पार्टीका जिम्मेवार नेताहरू सम्मिलित कार्यदलले स्पष्ट गर्नुपर्ने र मिलाउनुपर्ने थप विषयहरूलाई समाधान गर्ने छ।’

सर्वोच्च अदालतमा विचाराधीन विषयमा सबै सम्भावनालाई ख्याल गर्दै र मुलतः संविधानको रक्षा, लोकतान्त्रिक प्रकृयाको निरन्तरता र पार्टी एकताको खातिर एउटा तार्किक निष्कर्षमा पुग्नु उपयुक्त हुने उनले बताएका छन्। ‘सारमा अध्यक्षको वक्तव्यले पार्टीको शीर्ष नेतृत्वका बीचमा सार्थक संवाद हुनेछ र एमालेको एकतालाई अक्षुण्ण राख्न मद्घत पुग्ने अपेक्षा गर्छु। हजार माइलको यात्रा पहिलो पाइलाबाट नै सुरु हुन्छ,’ भट्टराईले भनेका छन्।