सुनसरी- बराहक्षेत्र नगरपालिका-२ बयरवन बजारबाट मिलन चोक, सिंहदेवी मन्दिर हुँदै सूर्यकुण्ड जोड्ने सडकका विद्युत पोल नहटाइँदा उक्त सडक आरसीसी गर्ने काम अवरुद्ध भएको छ।

विद्युत प्राधिकरणले समयमै पोल नसारिदिँदा काम गर्न कठिनाइ भएको हो। बराहक्षेत्र नगरपालिका–२ को ३० लाख लगानीमा उपभोक्ता समितिमार्फत उक्त सडकमा ढुंगाको सोलिङ हाली रड बिच्छ्याएर सिमेन्ट, बालुवा, गिटी प्रयोग गरी आरसीसी ढलान गर्ने योजना परेको वडाध्यक्ष होमप्रसाद गौतमले जानकारी दिए।

३० लाख रुपैयाँ बजेटमा मिलन चोकदेखि १२० मिटर लम्बाइसम्म आरसीसी ढलान गर्ने योजना रहेको उपभोक्ता समितिका अध्यक्ष रुपक श्रेष्ठले जानकारी दिए।

ढुंगा, गिटी, बालुवा निर्माण स्थलमा झारिसकिएकामा विद्युत प्राधिकरणले त्यस सडकमा पर्ने पोल समयमा नसारिदिँदा काम गर्न कठिनाइ भएको हो। निर्माणस्थलमा झारिएका सामानहरूका कारण करिब २७ दिनदेखि वृद्धवृद्धा, बालबालिका तथा सवारी साधन आउजाउ गर्न समस्या भएको स्थानीय डम्बर कार्कीले बताए।

निर्माण उपभोक्ता समितिका सचिव दीपेन्द्र पौडेलका अनुसार विद्युत पोल सारिदिन प्राधिकरणको धरान कार्यालयमा निवेदन र राजस्व रकम दाखिला गरे पनि हालसम्म पोल सार्न प्राधिकरणका कर्मचारीहरू नआएको र ढिलासुस्ती गरिरहेको स्थानीय बासिन्दाले बताए।

प्राधिकरण चतराका कर्मचारीलाई भन्यो भने धरानलाई देखाउने, धरानलाई भन्यो चतरालाई देखाउने तथा एकअर्कामा समन्वय नगरेजस्तो गरिरहेका छन्। मिलन चोकदेखि सिंहदेवी मन्दिरसम्म शहरी विकासको लगानी दायाँ–बायाँ दुवैतर्फ गरी ८४९ मिटर लम्बाइको ड्रेन निर्माण सम्पन्न भइसकेको छ।