काठमाडौं- बेल्जियमलाई २-० ले हराउँदै मोरक्कोले विश्वकपको नकआउट चरणमा पुग्ने सम्भावना जीवित राखेको छ।
समूह ‘एफ’को पहिलो खेलमा क्रोएसियासँग गोलरहित बराबरीमा रोकिएको मोरक्कोले आइतबार अल थुमामा स्टेडियममा दोस्रो हाफमा दुई गोल गर्दै बेल्जियमलाई पराजित गरेको हो।
वैकल्पिक खेलाडीका रूपमा मैदान प्रवेश गरेका अब्देलहामिद साबिरीले ७३औं मिनटमा फ्रिकिकमार्फत उत्कृष्ट गोल गर्दै मोरक्कोलाई अग्रता दिलाए। इन्जुरी टाइमको दोस्रो मिनटमा जाकारिया अबोउखालले मोरोक्कोलाई २–० को जित दिलाए।
विश्वकपमा मोरक्कोले जित निकालेको यो २४ वर्षपछि पहिलो घटना हो। चार वर्षअघि रुसमा सम्पन्न विश्वकपमा मोरोक्कोले समूह चरणमा दुई खेल हारेको थियो भने एक बराबरी खेलेको थियो।
बेल्जियमलाई हराएपछि २ खेलबाट ४ अंक जोड्दै मोरक्को शीर्ष स्थानमा उक्लेको छ। मोरक्कोले अब अन्तिम खेल क्यानाडासँग खेल्नेछ।