काठमाडौं- मोहन वैद्य नेतृत्वको नेकपा (क्रान्तिकारी माओवादी) फेरि फुटेको छ। असन्तुष्ट समूह ‘क्रान्तिकारी मोर्चा नेपाल’ घोषणा गरी अलग भएको छ।
नवगठित मोर्चाले आगामी मंसिरमा हुने संघीय र प्रदेशको निर्वाचनसमेत बहिष्कार गर्ने निर्णय गरेको छ। रिपोर्टर्स क्लबमा शुक्रबार आयोजित पत्रकार सम्मेलनमा मोर्चाका अध्यक्ष विष्णु खड्काले पार्टीभित्र आफूहरूले विद्रोह गरेर संयुक्त राजीनामा दिएको बताए। राजनीतिक पार्टी जनताको बीचमा जानुपर्छ भन्ने माग राखे पनि नेतृत्वले त्यसमा सुनुवाइ नगरेकाले आफूहरू अलग भएको उनले स्पष्ट पारे।
‘हामीले क्रान्तिकारी शक्तिको रक्षा गर्नूपर्ने माग अघि सारेका थियौं। यदि साँच्चिकै क्रान्तिकारी पार्टी हो भने सिद्धान्त र व्यवहारमा तालमेल हुनैपर्छ। देखाउने दारा एउटा र चपाउने दारा अर्कोको रूपमा पार्टीको विकास भयो र लाइन छाडेपछि पार्टी परित्याग गरेका हौं,’ उनले भने।
उनले वैद्य नेतृत्वको पार्टीले क्रान्तिकारी मुद्दाहरू लागु नगरी दासहरू उत्पादन गर्ने भट्टीको रूपमा विकास भएको आरोप लगाए। वैद्य नेतृत्वको पार्टीभित्र स्वार्थका झुण्डहरूको गुट, नेतृत्वको गुलामी गर्नेको समूह, दलालीकरणको विकाससँगै क्रान्तिकारी आवरणमा प्रतिक्रान्तिकारीहरू हावी भएको उनको टिप्पणी थियो। नेतृत्वमा संकीर्णवाद, जडसुत्रवाद, निम्न पुँजीवादी चिन्तन र दक्षिणपन्थी अवसरवाद हावी भएको पनि उनको आरोप छ।
खड्कालगायत वैद्यको पार्टीका केन्द्रीय सदस्य सुरेश वली, प्रदेश सदस्य धनवीर चौधरीलगायत नेता–कार्यकर्ताले उनको साथ छाडेका हुन्।