काठमाडौं- साँझ ७ बज्दा नबज्दै आगन्तुकको चहलपहल शुरु भइसकेको थियो। ८ बजेपछि विस्तारै क्लब परिसर भरिन थाल्यो। १० बजेपछि त होटल सोल्टी परिसरको डान्स क्लब ‘प्रिभे नेपाल’मा युवायुवतीको बाक्लो उपस्थिति भइसकेको थियो।
पाँचतारे होटलमा खुलेको नेपालको एक मात्र डान्स क्लब हो, प्रिभे नेपाल। होटल सोल्टी क्राउन प्लाजामा स्थापित यो डान्स क्लबको शुक्रबार भव्य रि–ओपनिङ भयो। सयौं युवा–युवतीले रि–ओपनिङमा संगीत र नृत्यको मज्जा लिए।
रि–ओपनिङमा आमन्त्रित चर्चित सांगीतिक ब्यान्ड ‘द एज’को प्रस्तुतिअघि काठमाडौंको चर्चित ब्यान्ड डाइनामिक्सले भरपुर मनोरञ्जन दियो। इभेन्ट होस्ट थिइन्, श्रृजना रेग्मी। ‘ओपनिङ एक्ट’को भूमिकामा थियो, डाइनामिक्स ब्यान्ड। रेजिडेन्ट डीजेहरू सन्दीप, आशिष, रोलिङ र इराजको प्रस्तुती थियो, डाइनामिक्सको तर्फबाट।
राति साढे १० बजे ‘द एज ब्यान्ड’ स्टेजमा उक्लिनु अघिसम्म डाइनामिक्सका डीजेहरूले आफ्ना गीतहरूका साथमा लोक पप, पप, ¥यापलगायत प्रस्तुतीमा युवा–युवतीलाई नचाए। लोक पप गायक अमृत गुरुङका कालजयी गीतहरूमा पनि नचाए, डाइनामिक्सका डीजेहरूले।
नृत्य र संगीतबाट मानिस थाक्छ कहाँ र ! राति ९ नबज्दै ‘ह्वेर इज एज ब्यान्ड’ भन्दै एज ब्यान्डका डीजेहरूलाई आमन्त्रित गरिरहेका थिए, आगन्तुकले। जब एज ब्यान्ड स्टेजमा उक्लियो, वान्स मोर नै वान्स मोर। राति झण्डै साढे तीन बजेसम्म आगन्तुकले छाड्दै छाडेनन्, एज ब्यान्डलाई।
त्यसबीचमा एज ब्यान्डले आफ्ना गीतहरू ‘थाहा छैन’, ‘लेखिएका शब्द’, ‘कसरी’, ‘मेरो आँशु’, ‘दुःख दिएर’, ‘जिउनलाई गाह्रो’, ‘प्रस्ताव’, ‘झुटो माया’लगायतको प्रस्तुती दिँदै भरपुर मनोरञ्जन दिए।
सन् १९९८ मा पोखरामा स्थापना भएको एज ब्यान्ड चर्चित रक–पप ब्यान्ड हो। यस्तै, १० भदौदेखि रि–ओपनिङ हुन थालेको प्रिभे नेपाल एउटा डान्स क्लब हो, जुन नेपालको पाँचतारे होटेलमा सञ्चालित एक मात्र क्लब हो।
यो क्लब २०१८ मै शुरु भएको हो। अहिले यसलाई पुनः नयाँ व्यवस्थापनका साथ नेपालका एक प्रख्यात उद्यमीले सञ्चालनमा ल्याएका छन्। क्लबमा करिब एक हजार गाडी पार्किङको व्यवस्था छ। यसमा सुरक्षाको पूर्ण व्यवस्था छ।