सुनसरी- बराहक्षेत्र नगरपालिका-१ स्थित चतरा बजारमा औलिया ज्वेलर्स सुन चाँदी पसलबाट करिब ६० लाखका गरगहना चोरीको भएको छ।

सञ्चालक लक्ष्मण धिमिरका अनुसार चोरले पछाडिपट्टि ढोका फोडी पसल भित्र पसेर सुन, चाँदीका गरगहना चोरी गरेको हो। चोरिएका गरगहना खोजी गरिदिन घिमिरेले इलाका प्रहरी कार्यालय चतरामा जाहेरी दिएका छन्।

इलाका प्रहरीका नायब निरीक्षक विनोद आचार्यका अनुसार शंकास्पद व्यक्तिहरूलाई छानबिनको दायरामा राखिएको छ।

छिन्नमस्ता ज्वलेर्सका सञ्चालक तथा सुनचाँदी व्यवसायी संघ सुनसरीका कोषाध्यक्ष रञ्जित लोहनीका अनुसार बराहक्षेत्र १ र २ मा चोरीका घटनामा बढेका छन्। बजारमा सीसीक्यामेरा जडान गरेर निगरानी गर्न उनले प्रहरीलाई आग्रह गरे।

हालै स्थानीय व्यापारी सज्जनकुमार रायको पसल अगाडि पार्किङ गरी राखेको को११प १७२९ नम्बरको पल्सर मोटरसाइकल राति चोरी भएको थियो। यसअघि पनि वडा नम्बर १ र २ मा सुभरा राई, सन्तोष साह, आलोक श्रेष्ठ, राजु कटुवाल, राम राई तथा सेन्चुरी बैंकमा कार्यरत कर्मचारी मोहन दाहाललगायतले पार्किङ गरी राखेको स्थानबाट रातको समयमा मोटरसाइकल चोरी भएको थियो।

यस्तै, स्थानीय सप्तकोशी ज्वेलेर्सको ढोका फोडी करिब साढे चार लाखका गहना चोरी भएको सञ्चालक महेश विकले बताए। प्रहरीले ती कुनै घटनाका दोषीलाई पक्राउ गर्न सकेको छैन।