काठमाडौँ । जापानका पूर्वप्रधानमन्त्री शिन्जो आबेमाथि गोली प्रहार गर्ने ४१ वर्षीय तेत्सुया यामागामीले आफ्नो परिवारमा आर्थिक समस्यामा परेको बताएका छन् ।
प्रहरी हिरासतमा रहेका यामागामीले आबे राजनीतिज्ञ भए पनि अमुक संगठनमा आबद्ध भएको हल्ला थाहा पाएर हत्या गरेको बताएका छन् । उनले आबे संलग्न भएको संगठनलाई आफ्नी आमाले सम्पत्ती दान दिएपछि आर्थिक समस्या आएकाले हत्यामा उत्रिन परेको बताएका हुन् ।
उनले आबेको हत्या गर्न अघिल्लो दिन नै निशाना बनाएको अनुसन्धानकर्तालाई बताएको जापानी प्रहरीले जनाएको छ । स्थानीय सञ्चार माध्यमले यस संगठनलाई धार्मिक भनी वर्णन गरेका छन् ।
आक्रमणकारी यामागामीकी आमाले पनि उक्त समूहलाई दिएको दानका कारण आफ्नो परिवारलाई आर्थिक समस्या भएको दाबी गरेका छन् । रिपोर्टअनुसार उनले आबेलाई अर्कै कार्यक्रममा मार्ने उद्देश्यले बिहीबार ओकायामाको पश्चिमी क्षेत्र गएका थिए ।
उक्त कार्यक्रममा सहभागीहरूले आफ्नो नाम र ठेगाना पेस गर्नु पर्ने भएपछि आफ्नो योजनाबाट उनी पछि हटेको बयान उनले दिएका अनुसन्धान अधिकारीले बताएका छन् ।
सिन्जो आबेका हत्याराको बयान : हल्लामा विश्वास गरेर मार्ने योजना बनाएँ