दाङ तुलसीपुर उपमहानगरपालिका-४ रक्षाचौरमा परम्परागत सिक्का भेटिएका छन्। बिहीबार त्यस स्थानमा सडक खन्ने क्रममा सिक्का भेटिएका हुन्।
गोटीखोलाबाट सिमरामा सडक खन्दा जेसीभी चालकले ती सिक्का भेटाएका थिए। त्यहाँ दुईवटा जेसीभीले बाटो खनिरहेका थिए।
सिक्का भेटिएपछि दुवै चालकले भागबण्डा गर्ने सहमति गरेका थिए। चालक सुवास चौधरी र राजन खड्काले त्यहाँ जेसीभी चलाएका थिए। उनीहरूमध्ये सुवासले सडक खन्ने क्रममा ती सिक्का भेटेका थिए। तर, सिक्का राजनले पनि आफ्नो भागमा पार्नुपर्ने माग गरेपछि सुवासले नदिँदा यो विषय सार्वजनिक भयो।
त्यसपछि राजनले सम्बन्धित जग्गावालालाई जानकारी दिए। स्थानीय शोभा भण्डारीको जग्गामा सिक्का भेटिएका हुन्। त्यसपछि जग्गाधनीले त्यहाँ सिक्का भेटिएको कुरा प्रहरीलाई जानकारी दिए।
इलाका प्रहरी तुलसीपुरका निरीक्षक बखतबहादुर शाहीका अनुसार भेटिएका सिक्का ५३७ थान छन्। तीमध्ये ७६ वटा एक रुपैयाँ उल्लेखित भारतीय र ४६१ वटा श्री ३ लेखिएका नेपाली सिक्का हुन्। ती सिक्का तुलसीपुर–१५ बस्ने जेसीभी चालक सुवासले घर लगेका थिए।
प्रहरीले अनुसन्धान क्रममा सुवासकै घरमा लुकाइराखेको अवस्थामा बरामद गरेको हो। अनुसन्धनकै क्रममा सातवटा सिक्का घरमा भुइँमा खसेको अवस्थामा भेटिएका थिए। त्यसपछि खोजतलास गर्न सहज भएको प्रहरीले जनाएको छ। सिक्कामा विसं १८०० तथा पृथ्वीनारायण शाह लेखिएको प्रहरीले बताएको छ। यस विषयमा अनुसन्धान भइरहेको प्रहरीको भनाइ छ। भेटिएका सिक्का सम्बन्धित निकायमा पठाउने प्रहरी निरीक्षक शाहीले बताए।
राससबाट