धरान उपमहानगरपालिकाका मेयर हर्क साम्पाङ नगरको खानेपानी समस्या सबैभन्दा पहिले समाधान गरेरै छाड्ने ध्याउन्नमा देखिन्छन्। उनी कहिले पानीमा रुझ्दै पानीको मुहान खोजी गर्न निस्किन्छन् त कहिले मुहानमा पुगेर सरसफाइमा जुटछन्।
पछिल्लोपटक उनी मुहानमा तैनाथ नगर प्रहरीलाई खाजा लिएर आफैं फिल्डमा पुगे। धरान–धनकुटा सडकमा पर्ने मुहानमा यात्रीले दिशा–पिशाब गर्ने गरेकाले उनले नगर प्रहरीको टोली नै तैनाथ गरेका छन्। नेपाल प्रहरीले पनि उक्त टोलीलाई साथ दिएको छ।
पानीको मुहानमा दिशा–पिसाब गर्ने गरिएकाले नगर क्षेत्रमा दुर्गन्धित पानी वितरण हुँदै आएको थियो। साम्पाङले मुहानमा दिशा–पिसाब गर्न बन्द गराएका छन्, नगर प्रहरीमार्फत। नगर क्षेत्रबाट टाढा पर्ने भएकाले नगर प्रहरीको टोलीले सहजै खाजा, पानी पाउँदैनन्। त्यसैले उनीहरूको हौसला बढाउन मेयर साम्पाङ आफैं खाजा लिएर गएका हुन्।
फिल्डमा पुगेर मेयर साम्पाङले नगर प्रहरी टोलीको समस्याबारे सोधेका थिए। कसैले अटेर गर्दै मुहान क्षेत्रमा दिशा–पिसाब गरेमा तत्काल खबर गर्न उनले निर्देशन दिएका थिए। र, गाडीको नम्बर टिपेर नगरपालिकामा पठाउन निर्देशन पनि दिए।
मुहान क्षेत्रमा सिफ्ट छुट्याएर नगर प्रहरी परिचालन गरिएको छ। एक सिफ्टमा तीनजनाले मुहान क्षेत्रको रेखदेख गर्छन्। र, जनचेतनाका लागि मुहान क्षेत्रको सडकमा दिशा–पिसाब नगर्न आग्रह गरिएका बोर्ड राखिएको छ।