विद्युतीय कार टेस्ला तथा स्पेस-एक्सका मालिक एलन मस्कले माइक्रोब्लगिङ ट्विटरलाई धम्क्याएका छन्। उनको धम्की यसपटक फर्जी एकाउन्ट्स र डेटाका बारेमा जानकारी नदिए ट्विटर खरिद डिलबाट बाहिरिने भन्ने आएको छ।
ट्विटर खरिद गर्ने बताएर चर्चामा आएका उनले निरन्तर कम्पनीलाई धम्क्याइरहेका छन्। कहिले आंशिक रूपमा खरिद डिलबाट बाहिरिएको बताउँछन् त कहिले अस्थायी रूपमा बाहिरिएको घोषणा गर्छन्।
सोमबार ट्विटरलाई पत्र लेख्दै उनले फर्जी एकाउन्ट्स र डेटाका बारेमा जानकारी नदिए खरिद डिलबाट बाहिरिने बताएका हुन्। यसपटक उनले लिखित रूपमा डिलबाट बाहिरिने भन्दै धम्क्याएका हुन्।
आफूले मागेको तथ्यांक नदिएर कम्पनीले जानाजान खरिद डिलप्रति हेलचेक्र्याइँ गरिरहेको मस्कको दाबी छ। सामाजिक सञ्जालमा पाँचदेखि २० प्रतिशत फर्जी एकाउन्ट भएको अनुमान छ।
मस्कले कम्पनीको मालिक बन्ने प्रक्रियामा फर्जी एकाउन्टका बारेमा जानकारी लिनु जरुरी रहेको उनका वकिलको दाबी छ। मस्कले ४४ अर्ब डलरमा ट्विटर खरिद गर्ने घोषणा गरेका थिए। तर, उनको घोषणा अझै कार्यान्वयन भएको छैन।