नवनिर्वाचित जनप्रतिनिधिका अनेक कार्ययोजना छन्, अनेक सपना पनि पूरा गर्ने सोचेका छन्। झापाको मेचीनगर नगरपालिका-४ का वडाध्यक्ष अर्जुन कार्की पनि तिनै जनप्रतिनिधिमध्येका हुन्, जो लामो समयदेखि वातावरण संरक्षण अभियानमा संलग्न छन्।
शुक्रबार उनले पत्रकार सम्मेलनमार्फत मानव-वन्यजन्तु द्वन्द्व घटाउने आफ्नो कार्ययोजनाबारे पत्रकारहरूलाई जानकारी दिए। उनले पत्रकार सम्मेलन पनि मेची नदीको डिलमा आयोजना गरे।
मेची नदीको त्यही डिल उक्लिँदै बर्सेनि भारतबाट नेपाल आउने जंगली हात्तीले हाल मेचीनगर–४ मा पर्ने बाहुन्डाँगीमा जनधनको क्षति गर्दै आएका छन्। र, उनले पत्रकारहरूलाई भारतीय हात्ती बस्तीमा आउन रोक्ने कार्ययोजनाबारे जानकारी दिए।
आफू हात्ती रोक्न बनाइएको डिलमा बसे, पत्रकारहरूलाई परालको पिरामा बसाले। खासमा, २२ जेठमा परेको विश्व वातावरण दिवस मनाउने सन्दर्भमा उनको पत्रकार सम्मेलन थियो।
आफ्नो पाँचवर्षे कार्यकालमा वातावरण संरक्षणलाई आफूले विशेष प्राथमिकता दिने वडाध्यक्ष कार्कीले बताए। बाहुन्डाँगी क्षेत्रलाई हरियालीयुक्त सुन्दर शहर बनाउन पाँच वर्षभित्रमा पाँच लाख नयाँ बिरुवा रोप्ने उनले बताए। मेची नदी किनारलाई हरियालीयुक्त बनाउने पनि बताए।