काठमाडौं– माओवादी केन्द्रका २४९ जना जनप्रतिनिधि यतिबेला काठमाडौंमा छन्। उनीहरूलाई पार्टीले नै संघीय राजधानी झिकाएको हो।
काठमाडौं पुतलीसडकस्थित पुरानो कुमारी हलमा उनीहरूलाई पाँचवर्षे कार्यकालमा कसरी काम गर्ने भन्ने सिकाउन माओवादीले बोलाएको हो। पालिकास्तरबाटै समाजवादको आधार तयार पार्ने कार्ययोजनाबारे माओवादीले आफ्ना जनप्रतिनिधिलाई प्रशिक्षण दिँदैछ। दुईदिने प्रशिक्षणमा माओवादी अध्यक्ष पुष्पकमल दाहाल ‘प्रचण्ड’लगायत नेता प्रशिक्षक बन्दै छन्।
बुधबार र बिहीबार चल्ने प्रशिक्षणमा स्थानीय सरकार सञ्चालन, सेवा प्रवाह, विकास निर्माण, सुशासन, स्वास्थ्य, शिक्षा, बजेट तथा कानून निर्माणलगायत विषय समेटिएको माओवादीले जनाएको छ।
पार्टीका शीर्ष नेता, संघीयताविज्ञ, अर्थशास्त्री, पूर्वमहान्याधिवक्ता, स्थानीय सरकार सञ्चालनका विज्ञ, पूर्वप्रशासकलगायतलाई प्रशिक्षक बनाइएको छ।
२०७४–०७९ मा उत्कृष्ट काम गरेका पालिका प्रमुखहरूले पनि आफ्नो अनुभव सुनाउने माओवादीले जनाएको छ।
पहिलो दिन बुधबार ‘स्थानीय सरकारको कानूनी क्षेत्राधिकार, काम, कर्तव्य र अधिकार’ विषयमा पूर्वमहान्याधिवक्ता मुक्ति प्रधानले प्रशिक्षण दिँदै छन्। यस्तै, पार्टी स्कुल विभाग प्रमुख तथा पूर्वमन्त्री गिरिराजमणि पोखरेल, स्थानीय तह विज्ञ डा. खिमलाल देवकोटा, ‘स्थानीय तह र सामाजिक न्याय’ विषयमा पार्टीको स्थानीय तह विभागका प्रमुख उर्मिला अर्याल र ‘स्थानीय सरकार र सुशासन’ विषयमा पूर्वमुख्यसचिव लीलामणि पौड्यालले प्रशिक्षण दिने कार्यक्रम छ।
२०७४ सालको निर्वाचनपछि पनि माओवादीले आफ्ना विजयी जनप्रतिनिधिलाई तीनदिने प्रशिक्षण दिएको थियो।