कैलाली । जेन–जी आन्दोलनका क्रममा ज्यान गुमाएका शहीदहरूको सम्झनामा निसर्ग अस्पताल परिसरमा दीप प्रज्वलन गरिएको छ। शहीदहरूको बलिदानप्रति श्रद्धाञ्जली अर्पण गर्दै आयोजित कार्यक्रममा शहीद गौरव जोशीको परिवारलाई ३ लाख ५१ हजार रुपैयाँ आर्थिक सहयोग प्रदान गरिएको हो।
निसर्ग अस्पतालले प्रदान गरेको ३ लाख ५१ हजार रुपैयाँको चेक शहीद गौरव जोशीकी आमा गुन्ना जोशीलाई हस्तान्तरण गरिएको छ।
कार्यक्रमका प्रमुख अतिथि डा. हेमराज पन्तले शहीदहरूको बलिदानलाई केवल सम्झनामा सीमित नराखी उनीहरूले देखाएको परिवर्तनको बाटोलाई आत्मसात् गर्नुपर्ने बताए। उनले शहीद परिवारको दुःखमा समाज र संस्थाहरूले साथ दिनुपर्नेमा जोड दिए।
निसर्ग अस्पतालका अध्यक्ष तीर्थराज पन्तले शहीद परिवारको पीडा शब्दमा व्यक्त गर्न नसकिने बताउँदै अस्पतालले आफ्नो सामाजिक उत्तरदायित्वअन्तर्गत सहयोग गरेको बताए।
“गौरवको परिवारले गुमाएको पीडा पैसाले पूर्ति गर्न सकिँदैन। तर दुःखको यो घडीमा परिवारसँग हामी पनि छौँ भन्ने अनुभूति गराउन सकिन्छ। यही भावनाले सहयोग गरेका हौँ,” अध्यक्ष पन्तले भने।
कार्यक्रममा कैलाली उद्योग वाणिज्य संघका अध्यक्ष पुष्करराज ओझा लगायत अस्पतालका चिकित्सक, कर्मचारी तथा विभिन्न क्षेत्रका व्यक्तिहरूको सहभागिता रहेको थियो।
दीप प्रज्वलनमार्फत जेन–जी आन्दोलनमा ज्यान गुमाएका शहीदहरूप्रति श्रद्धाञ्जली अर्पण गर्दै सहभागीहरूले उनीहरूको योगदान र बलिदानलाई सदैव स्मरण गर्ने प्रतिबद्धता व्यक्त गरेका थिए।
शहीद गौरव जोशीकी आमा गुन्ना जोशीलाई प्रदान गरिएको सहयोगले शोकमा रहेको परिवारलाई केही राहतसँगै समाज उनीहरूको साथमा रहेको अनुभूति गराउने विश्वास लीएको अध्यक्ष जोशीले बताए ।
