कञ्चनपुर । नेपाल–भारत मैत्री संघको सहयोग तथा नेपाल–भारत मैत्री संघ पुनर्वास उपशाखा, त्रिभुवनवस्ती कञ्चनपुरको आयोजनामा सञ्चालित ९० दिने आधारभूत सिलाइ–कटाइ तालिम सम्पन्न भएको छ।
जेष्ठ १३ गतेदेखि सञ्चालन भएको तालिममा १८ जना सहभागी भएका थिए । प्रशिक्षक लिला बमले सहभागीहरुलाई तालिम प्रदान गरेका थिए ।
सहभागीहरूले सिलाइ–कटाइसम्बन्धी आधारभूत सीप तथा व्यावहारिक ज्ञान हासिल गरेका छन्। सहभागीहरुलाई प्रमाणपत्र समेत बितरण गरिएको छ । तालिम सम्पन्न भएपछि सहभागीहरूले आफूहरूले सिकेको सीपलाई अब आयआर्जन र स्वरोजगारसँग जोड्ने बताएका छन्।
तालिमको समापन कार्यक्रममा सहभागीहरूले तालिम अत्यन्तै उपयोगी भएको बताउँदै आधारभूत तालिमपछि एडभान्स सिलाइ–कटाइ तालिमको समेत अवसर उपलब्ध गराउन नेपाल–भारत मैत्री संघसँग आग्रह गरेका छन्।
नेपाल–भारत मैत्री संघ पुनर्वास कंचनपुर, उपशाखाका अध्यक्ष बिश्वनाथ बिष्टको सभापतित्वमा सम्पन्न समापन कार्यक्रममा संघका केन्द्रीय उपाध्यक्ष हरि शंकर ठाकुरप्रमुख अतिथि रहेका थिए ।
कार्यक्रममा बोल्दै केन्द्रीय उपाध्यक्ष ठाकुरले सीपमूलक तालिमले व्यक्ति तथा परिवारलाई आत्मनिर्भर बनाउन महत्वपूर्ण भूमिका खेल्ने बताए। उनले तालिममा सिकेको सीपलाई व्यवहारमा उतार्दै स्वरोजगार बन्न सहभागीहरूलाई आग्रह गरे ।
“सीप हातमा भएपछि अवसर खोज्न धेरै टाढा जानुपर्दैन। सिकेको सीपलाई व्यवसायसँग जोड्न सके यसले आत्मनिर्भर बन्न महत्वपूर्ण आधार तयार गर्छ,” ठाकुरले भने ।
नेपाल–भारत मैत्री संघले आगामी दिनमा पनि स्थानीय आवश्यकता र मागअनुसार सीप तथा स्वरोजगारमूलक कार्यक्रम सञ्चालन गर्न पहल गर्ने उपाध्यक्ष ठाकुरले बताए ।
समापन कार्यक्रममा सहभागीहरूले तालिम सञ्चालनका लागि सहयोग गर्ने नेपाल–भारत मैत्री संघप्रति आभार व्यक्त गर्दै आगामी दिनमा थप दक्षता हासिल गर्न एडभान्स तालिमको व्यवस्था गरिदिन आग्रह गरेका छन्।
९० दिनसम्म सञ्चालन भएको उक्त तालिमले सहभागीहरूमा नयाँ सीपसँगै आत्मविश्वाससमेत बढाएको आयोजकको भनाइ छ।
