काठमाडौं- आज ५ जुलाई। विश्व इतिहासका असंख्य घटनाले आजको दिनलाई संसारभर सम्झना गराउँछन्। प्रस्तुत छ, आजको दिन भएका केही विश्व चर्चित घटनाको सारसंक्षेप।
– सन् १८११- स्पेनबाट स्वतन्त्र भएको भेनेजुएलाको घोषणा
दक्षिण अमेरिकी मुलुक भेनेजुएलाले २१४ वर्षअघि आजकै दिन स्पेनबाट स्वतन्त्र भएको घोषणा गरेको थियो। तर, त्यसका कारण भेनेजुएलामा स्वतन्त्रता युद्ध शुरु भएको थियो। १० वर्ष चलेको युद्धपछि सन् १८२१ मा मात्र उक्त मुलुकले पूर्ण स्वतन्त्रता प्राप्त गरेको थियो।
– सन् १९७५- पोर्चुगलको कब्जाबाट केप भर्ड स्वतन्त्र
सन् १९७५ मा आजकै दिन सेन्ट्रल एटलान्टिक महासागरको टापु मुलुक केप भर्ड पोर्चुगलको कब्जाबाट स्वतन्त्र भएको थियो। उक्त पश्चिम अफ्रिकी टापु मुलुक १५ औं शताब्दीको उत्तरार्द्धदेखि पोर्चुगलको कब्जामा थियो।
– सन् १९९६- क्लोनिङबाट जन्मियो विश्वको पहिलो भेडा
सन् १९९६ मा आजकै दिन क्लोनिङबाट संसारकै पहिलो स्तनधारी जनावर जन्मिएको थियो। ‘डली’ नाम दिइएको भेडालाई क्लोनिङबाट जन्माइएको थियो। बेलायतको एडिनबर्ग विश्वविद्यालयको रोसलिन इन्स्टिच्युटमा इयान विल्मुट र किथ क्याम्पबेल नेतृत्वको टिमको प्रयासमा क्लोनिङबाट पहिलोपटक स्तनधारी जनावरको जन्म सम्भव भएको थियो। त्यो क्लोनिङ विज्ञानको ठूलो उपलब्धि थियो। तथापि, ‘डली’ लामो समय जीवित रहन सकेन। वैज्ञानिकहरूले उक्त भेडा १२ वर्ष जीवित रहने भविष्यवाणी गरेका थिए। तर, ७ वर्ष नपुग्दै मर्यो।
– सन् २०१२- बालबालिका अपहरण अभियोगमा पूर्वराष्ट्रपतिलाई ५० वर्षको जेल
सन् २०१२ मा आजकै दिन दक्षिण अमेरिकी मुलुक अर्जेन्टिनाका पूर्व राष्ट्रपति जर्ज राफेल भिडेलालाई ५० वर्षको जेल सजाय सुनाइएको थियो। १७ मे २०१३ मा ८७ वर्षको उमेरमा जेलमै उनको मृत्यु भएको थियो। उनीमाथि राजनीतिक बन्दीहरूबाट जन्मेका करिब ४०० बालबालिकाको अपहरण गरेको अभियोग थियो।
– सन् २०१७- सिकागो नरसंहारमा १५ को हत्या, ११० घाइते
अमेरिकाको सिकागो शहरमा आजकै दिन भएको नरसंहारमा १५ जनाको हत्या भएको थियो। स्वतन्त्रता दिवसको क्रममा दिइएको विदाका क्रममा सिकागोका विभिन्न स्थानमा अन्धाधुन्द गोली प्रहारका घटना भएका थिए।
– सन् २०१७- भारतका धर्मगुरुको शव फ्रिजमा राख्न अदालतको अनुमति
सन् २०१७ मा आजकै दिन भारतीय धर्मगुरु आशुतोष महराको मृत्यु भएको तीन वर्षपछि उनका अनुयायीहरूले उनको शरीरलाई फ्रिजरमा राख्न अदालतबाट अनुमति पाएका थिए। उनी पुनः जीवित हुन सक्ने अनुयायीहरूको विश्वास थियो।
– सन् २०१९- बेबिलोन शहर विश्व सम्पदा सूचीमा
सन् २०१९ मा आजकै दिन इराकको प्राचीन शहर बेबिलोनलाई विश्व सम्पदा सूचीमा सूचीकृत गरिएको थियो। बेबिलोनस्थित प्राचीन बगैंचा विश्वका ७ आश्चर्यको सूचीमा छ।
– सन् २०२२- सांघाई प्रहरीको डेटाबेस ह्याक गर्दै १ अर्ब युआन माग
सन् २०२२ मा आजकै दिन चीनको सांघाईस्थित प्रहरीको डेटाबेस ह्याक गरेर ह्याकरले १ अर्ब चिनियाँ युआन माग गरेको थियो। यो चिनियाँ प्रहरीको सम्भवतः हालसम्मको सबैभन्दा ठूलो सुरक्षा कमजोरी थियो। ह्याकरले चिनियाँ नागरिकका महत्त्वपूर्ण विवरण रहेको डेटाबेस ह्याक गरेको थियो।
– सन् २०२३- ४ जुलाई सेलिब्रेसनमा अमेरिकामा मारिए दर्जनौ
सन् २०२३ मा अमेरिकी स्वतन्त्रता दिवसको छुट्टि अर्थात ४ जुलाईमा देशभर अन्धाधुन्द गोली प्रहारबाट दर्जनौंको हत्या भएको थियो।