काठमाडौंको आन्दोलनपछि
गाउँ पुगेका बड्का भलमन्साले

सबै गाउँलेलाई बोलाए, र भने :
म सबैलाई मन परेको छु
मेरो बोली सबैलाई मन परेको छ
मेरो व्यवहार मन परेको छ
मैले भ्रष्‍टाचार गरेको छु

छ, छैन भन
अहिले नै म मेरो
भलमन्साको पद छोडिदिन्छु

मेरो कारणले भोलिका दिन
गाउँमा आगो नलागोस्
स्कुल नभत्कियोस्
बैंक नलुटियोस्
कसैको ज्यान नजाओस्

अबको माघीमा म आफ्नो
पद छोड्ने छु !
नाति पुस्ताको भलमन्सा भएको
हेर्न चाहन्छु !

काठमाडौंकाले यति बुझेको भए
कसैको ज्यान जाने थिएन
देश जल्ने थिएन