काठमाडौँ । रुसले छिमेकी मुलुक युक्रनमाथि सैन्य हमला शुरु गरेको तीन महिना पूरा हुन लागेको छ । यस क्रममा लाखौँ मानिस घरबारविहीन भएका छन् । उनीहरू छिमेकी मुलुकहरूमा शरणार्थी जीवन बिताइरहेका छन् ।
युद्धमा हजारौ मानिसले ज्यान गुमाएका छन् । सोही संख्यामा मानिसहरू घाइते भएका छन् । दुई देशको सैन्य हमलाबाट हजारौँ मानिस प्रभावित भएका छन् ।
युद्धकै क्रममा युक्रेनकी एउटी नर्सले आफ्ना दुवै खुट्टा गुमाएकी छन् । एउटा विस्फोटनमा परी उनले आफ्ना दुवै खुट्टा गुमाएकी हुन् । तर, उनको अस्पतालमै विवाह सम्पन्न भएको छ ।
आफ्नो विवाह समारोहमा उनले आफ्नो श्रीमानसँग नाचेको भिडियो सार्वजनिक भएको छ । ओक्साना नाम गरेकी २३ वर्षीया नर्सको युक्रेनमा विभिन्न चरणमा शल्यक्रिया भएसँगै थप थप उपचारका लागि जर्मनी जाने भएकी छन् ।
जमिनमुनि बिच्छ्याइएको विस्फोटक पदार्थ विस्फोट हुँदा उनले दुवै खुट्टा गुमाउन पुगेकी हुन् । उपचारपछि सन्चो भएकी उनी विवाहपछि आफ्ना श्रीमानसँग नाचेको देखिने भावोत्तेजक भिडियो सार्वजनिक भएको हो ।