एक बिहान घुम्‍ने सिलसिलामा
पुराना मित्र भेटिए

खुशी भयौं धेरै दिनको भेटपछि
चिया खाँदै
सुख-दुःख साटियो

पुराना कुरा गरियो
पुराना भेट नभएका
साथीहरूको कुरा गरियो

नयाँ गफ गरियो
गरेका उपलब्धिका गफ गरियो

नेपालको अहिलेको अवस्थाको कुरा गरियो
हामी हुँदा यस्तो थियो
हामी हुँदा उस्तो थियो
हामी हुँदा गज्जब थियो
सम्म पनि भनियो !

राजनीतिको कुरा हुँदा
रमाउँदै गफिए मित्र
आफ्ना ताईं न तुईंको विश्लेषण सुनाए
केहीलाई गाली गर्न पनि भ्याए

मित्रलाई दुःखी देखें
मनमा केही गुनासा देखें

सोधें र पाएँ
सँगै काम गरेकाले देख्दा
पनि हात उठाएनन् रे !
दुई हात जोडी नमस्कार गरेनन् रे !

बुझ्‍न गाह्रो भएन
मित्रले रिटायरमेन्ट स्वीकार गरेका
रहेनछन्

अहिले पनि पुरानै पदको
तुजुक बाँकी रहेछ

नमस्कार, जय नेपालको
बानी छुटेको रहेनछ

जे भए पनि मैले नमस्कार गरें
र, आफ्नै बाटो लागें !