सिमेन्टका टावर
हिमालका टाकुरामा
पहाडका टुप्पामा
डाँडामाथि,
जंगलको बीचमा
गाउँ शहरमा
खेतका किनारमा
नदीको डिलमा
घरकै छेउमायी कसको लहडले
ठडिएका हुन् ?
नव सामन्तहरूको आदेशले हो कि ?
देश जिम्मा लिएका जिम्वालहरूको
सनकको प्रतिफल हो ?हाम्रा गाउँका बडका भलमन्सा
चित्त नबुझेर भन्दै थिए –
पिर्के सलामीले नपुगेर
टावरको टुप्पोमा बसेर सलामी खाऊ है
नव सामन्ती साहेबहरू
टावरको टुप्पोबाट देखिने छ
देशको गरिबी
भोका पेट, नांगा शरीर
विदेश जानेको लाम
बाढीले डुबाएको खेत
रुखको छहारीमुनि
च्यातिएको बोरामा बसेर
पढ्दै गरेका विद्यार्थी
डोकोमा बोकिएर अस्पताल
जाँदै गरेका बिरामीहरू
सुत्केरी दिदी बहिनीहरू
गल्फको रेतमा
पसिनाले निथ्रुक्क भिजेका
देशको अर्थतन्त्र धानेका
नेपाली सन्ततिहरू
विदेशमा भविष्य खोज्दै
पाँचै महादेशमा हिँडिरहेको
नेपालीहरूको लाम
हे मान्यवर, एउटा विभाग बनाऊ
ठाउँ खोजी-खोजी टावर ठड्याउन
सुरक्षा डफ्फा बनाऊ
टावर सलामी दिन
सर्वोत्कृष्ट टावर कसको जिल्लामा ?
सबभन्दा अग्लो कसको गाउँमा ?
प्रतियोगिता गरौं
पुरस्कार बाँडौं
मलाई पनि मेरो गाउँमा
आकाशै छुने टावर बनाउने मन छ
टावरको टुप्पामा बसी देशमा चलिरहेको
राजनीतिको तमाशा हेर्ने मन छ
चीनबाट पोखरा हुँदै दौडेको रेल
हेर्ने मन छ
भारतबाट आउँदै गरेका पानीजहाज
हेर्ने मन छ
चुनावमा गरिएका वादा
हेर्ने मन छ
अर्को आउँछ
फेरि शुरु हुन्छ
नयाँ भीमसेन थापा हुने
हानाथाप
कुर्सीको हैन नेपालको माया
गर्नेको सधैं जय होस्