काठमाडौँ । आगामी वैशाख ३० गते हुने स्थानीय चुनावको निर्वाचनमा सत्तारुढ गठबन्धन दलहरूले सहकार्य गर्न प्रयास गरिरहेको छ । यसैबीच बीच जिल्ला स्तरमा सहमति जुटाउन केन्द्रीय स्तरका नेताहरूको बैठक बस्दै आएको छ ।
तर, संखुवासभामा भने नेपाली कांग्रेसले नेकपा माओवादी केन्द्रसँग गठबन्धन नगर्ने निर्णय गरेको छ । लगातार पाँच दिनसम्म खाँदबारीमा सत्तारुढ गठबन्धनको बैठक पनि सहमति जुटाउन नसकेको हो ।
आज पनि गठबन्धनको बैठक बसेको थियो । बैठकमा भागबण्डाको कुरा नमिलेपछि गठबन्धनका नेताहरू बिना निष्कर्ष बाहिरिएका थिए । गठबन्धनका संयोजक एवम् कांग्रेस सभापति दीपक खड्काले माओवादी केन्द्रसँग गठबन्धन गर्ने सम्भावना सकिएको बताएका थिए ।
माओवादी केन्द्रका नेताले पनि जिल्ला स्तरमा तालमेलको सहमति सकिएको बताएका छन् । तर, माओवादी केन्द्रबाहेक नेकपा एकीकृत समाजवादी, जनता समाजवादी पार्टी र राष्ट्रिय जनमोर्चासँग भने जिल्ला स्तरमा गठबन्धन गर्ने तयारी गरिएको छ ।