एयरपोर्टको कफीसपमा
ब्रेक सुमा लुकाइल्याएको
सुनको दाम्लो लगाएका
बाँसबारीमा बनेको जुत्ता लगाएका
नक्कली भुटानी शरणार्थीको
खोल ओढेका किर्ते साइँला

गिरिबन्धुको चियामा
चोपेर बिस्कुट खाँदै गर्दा

नयाँ राजनीतिक परिवर्तनबारे
थाहा पाए र हर्षित हुँदै
तुरुन्त टिकट क्यान्सिल गरी
बाहिर नजाने निर्णय गरे

अब के को डर
मुद्दा चलाउने कसको आँट
छाती खोलेर हिँड्ने हो
अब त यहीं बस्ने हो

उही मान्छे
उही प्रवृत्ति फर्केर आएपछि
डङ्‍काका साथ
फेरि नयाँ कथा जन्माउने हो