एलसाल्भाडोरका विधायकहरूले आइतबार संकटकालीन कानूनलाई स्वीकृत गरेको संसदका सभामुखले बताएका छन्।
संसदको अत्यधिक बहुमतले स्वीकृत गरेको विधेयकले ‘आपराधिक समूहले सार्वजनिक शान्तिमा गम्भीर खलल पुर्याएपछि देशको सम्पूर्ण भूभागमा संकटकालीन शासन लागू गरेको’ घोषणा गरेको छ।
यो कानूनले मानिसको भीडभाडमा रोक लगाएको छ। यस्तै, यसले सरकारलाई आवश्यकताअनुसार सञ्चारमाध्यम बन्द गर्न सक्ने र बिनावारेन्ट जो कसैलाई पक्राउ गर्ने अनुमति दिएको छ।
केही समयदेखि एलसाल्भाडोरमा आपराधिक समूहको हिंसा बढिरहेको थियो। शनिबार मात्र अपराधिक समूहले ६२ जनाको हत्या गरेका थिए। पछि प्रहरी र सेनाले कारवाही चलाएर मारा साल्भाट्रुचा (एमएस–१३) नामक आपराधिक ग्याङका कैयौं सदस्यलाई पक्राउ गरेको थियो।
‘हामी आपराधिक समूहविरुद्धको लडाईंमा पछि हट्ने छैनौं। हामी जघन्य हत्यामा संलग्न दोषीलाई पक्राउ गरेर न्यायको कठघरामा नउभ्याएसम्म चुप बस्ने छैनौं,’ राष्ट्रिय प्रहरीले ट्विटरमा लेखेको छ।
एएफपीबाट