नेपालमा जताततै
जेमा पनि राजनीति छ
त्यो पनि टुकुचाको फोहोरजस्तै
गन्हाउने राजनीति

पानीमा राजनीति छ
जमिनमा राजनीति छ
आकाशमा पनि राजनीति छ

कर्मचारीको काँधमा चढी
बेतोड दौडिरहेको छ राजनीति
रोक्न खोजे लात हान्छ
समाउन खोजे टोक्छ

नांगो राजाको कथाजस्तै
चाटुकारको थपडीमा
नाचिरहेछ राजनीति

नेताका भाषण
थोत्रो हारमुनियमजस्तै छ
बिग्रेको एलपी रेकर्डजस्तै
मात्तिएर कराएको बोकाजस्तै

सरकारी कोषमा मनपरि छ
लुटाएका छन्
आफ्नै घरको सम्पत्तिजस्तै

हेर्दै जाउँ कहिलेसम्म
चल्ने हो यो रमिता
कहिले त रोकिएला
कहिले त चेतौंला
हामी नेपाली भेडा