देश बनाउने भनेर
सत्तामा पुगेका महामहिमहरूको
चर्तिकला बुझी नसक्नु छ

कोही नक्कली भुटानी शरणार्थीको
नाममा ठगीको व्यापार गर्दै ठिक्क

कोही भुईंमान्छेको पसिना बगाएर
जम्मा गरेको
सहकारीको रकम डुबाउँदै ठिक्क

कोही सरकारी सम्पत्ति
अरूका नाममा सार्दै ठिक्क

कोही देशलाई भारी बोकाउने गरी
आफ्ना परिवार तह लाउँदै ठिक्क

कोही आफ्ना छोराछोरीलाई
सित्तैंमा पढाउन
विदेशीको चाकरी गर्दै ठिक्क

कोही जनताको पसिनाबाट जम्मा गरेको
देशको ढुकुटी चुस्दै ठिक्क

कोही डकैती शैलीमा लुटेको धन
विदेशमा थन्क्याउँदै ठिक्क

लाज शर्मले पनि लाज मानेपछि
बदमाशी गर्नेहरू
भ्रष्‍टाचारको सिता अड्किएको दाँत
ङिच्च देखाउँदै ठिक्क