एमालेले पार्टीबाट निष्कासन गरेका र एकीकृत समाजवादीमा प्रवेश गरेका १४ सांसदको मुद्दामा आइतबार सुनुवाइ हुँदैछ।
एमाले अध्यक्ष केपी ओलीले दायर गरेको रिटमाथिको सुनुवाई सर्वोच्च अदालतका न्यायाधीशद्वय ईश्वरप्रसाद खतिवडा र कुमार चुँडालको इजलासमा परेको छ। सर्वोच्चमा उक्त मुद्दा विचाराधीन रहँदा संघीय संसदका दुवै सदन एमालेले अवरुद्ध बनाउँदै आएको छ।
२५ साउनमा एमाले केन्द्रीय कमिटीले माधवकुमार नेपालसहित १४ सांसदलाई निष्कासन गरेको थियो। त्यससम्बन्धी पत्र १ भदौमा संसद सचिवालय र निर्वाचन आयोगमा दर्ता भएका थिए।
तर, संसद सचिवालयले उनीहरू सांसद पदबाट बर्खास्त भएको सूचना प्रकाशित नगरेपछि माधवकुमार नेपाललगायत नेतालाई एकीकृत समाजवादी गठन गर्न बाटो खुलेको थियो। एकीकृत समाजवादी निर्वाचन आयोगमा दर्ता भएपछि मात्र संसद सचिवालयले उनीहरूलाई निष्कासन गर्नु नपर्ने सूचना टाँसेको थियो।
अदालतबाट अन्तरिम आदेश जारी भएमा माधवकुमार नेपाल, रामकुमारी झाँक्री, मेटमणि चौधरी, विरोध खतिवडा, कल्याणी खड्का, मुकुन्द न्यौपाने, जीवनराम श्रेष्ठ, कृष्णलाल महर्जन, भवानी खापुङ, कलिला खातुन, लक्ष्मीकुमार चौधरी, सरला यादव, निरा जैरु र सरला यादवको सांसद पद जानेछ। र, एकीकृत समाजवादीको वैधानिकतामाथि प्रश्न खडा हुनेछ।