काठमाडौँ । नेकपा एकीकृत समाजवादीका सम्मानित नेता झलनाथ खनालले आफ्नो पार्टीले स्थानीय तहको आसन्न निर्वाचनमा सबै स्थानमा उम्मेदवारी दिने बताएका छन् ।
पार्टीको इलाम–काठमाडौँ सम्पर्क मञ्चद्वारा आयोजित भेलामा नेता तथा कार्यकर्तालाई स्थानीय निकाय निर्वाचन ऐनको अध्ययन गर्न सुझाव दिए । उनले सर्वहारा र श्रमिक वर्गको प्रतिनिधित्व गर्ने एकीकृत समाजवादीको विजयले मात्र मुलुकमा अर्थ व्यवस्था कायम भई समृद्धि हुने बताए ।
खनालले जनवादी क्रान्ति सफल भए पनि देशमा गरिबी न्यूनीकरण हुन नसकेको तथा शोषण, अन्याय, विभेद, अत्याचारको अन्त्य हुन नसकेकामा चिन्ता व्यक्त गरे । उनले भने, ‘वर्गीय शोषण, अन्तर्राष्ट्रिय पूँजीवादीको शोषण छ, जबसम्म हामी समाजवादमा पुग्न सक्तैनौँ, त्यसबेलासम्म समाजिक विभेद कायम रहन्छ ।’
नेता खनालले कलाकारले अब समाजवादी कला र साहित्य सिर्जना गर्नु पर्नेमा जोड दिए । पोलिटव्यूरो सदस्य प्रेमल खनाल, केन्द्रीय सदस्य प्रमिला बस्नेतलगायतले हरेक जिल्लामा समाजवादीका उम्मेदवारलाई जिताउन आवश्यक प्रचार–प्रसारमा क्रियाशील रहन कार्यकर्तालाई आग्रह गरे ।