काठमाडौं– नागरिक उन्मुक्ति पार्टीले सुदूरपश्चिम प्रदेशसभा सांसदहरूलाई मुख्यमन्त्री कमलबहादुर शाहलाई विश्वासको मत नदिन निर्देशन दिएको छ।
पार्टी अध्यक्ष रञ्जिता श्रेष्ठले कांग्रेस नेतृत्वको सरकारलाई विश्वासको मत नदिन ह्वीप जारी गरेकी हुन्। उनले नाउपा संसदीय दलको कार्यालय, सुदूरपश्चिम प्रदेश कमिटीलाई पत्र लेख्दै विश्वासको मत नदिने ह्वीप जारी गरेकी हुन्।
उनले सुदूरपश्चिम प्रदेश संसदीय दलको विधान केन्द्रीय कमिटीबाट पास नभएको हुँदा दैनिक सभा सञ्चालन लगायतका कार्यक्रमहरूका लागि घनश्याम चौधरीले संसदीय दलको नेताको रूपमा कामकाज गरे पनि प्रदेश सभाको महत्त्वपूर्ण निर्णयमा ह्वीप लगाउने अधिकार पार्टीको केन्द्रीय अध्यक्षलाई नै भएको दाबी गरेकी छन्।
मुख्यमन्त्री शाहले बिहीबार प्रदेश सभामा विश्वासको मत लिने कार्यतालिका छ।
फागुन २३ गते माओवादीले समर्थन फिर्ता लिएपछि मुख्यमन्त्री शाहले विश्वासको मत लिन लागेका हुन्। अहिले कांग्रेसका १८, माओवादीका सभामुखसहित ११ एमालेका १०, नाउपाका ७, नेकपा एसका ४ साथै स्वतन्त्र र राप्रपाका १ र १ जना सांसद छन्। बिश्वासको मत लिन २७ सांसदको मत आवश्यक पर्छ।
