कैलाली- धनगढीबाट काठमाडौंका लागि उडेको श्री एयरलाइन्सको जहाज २ घण्टा २२ मिनट आकाशमा उडेपछि भैरहवामा आपतकालीन अवतरण गरिएको छ।

बिहान ७ः१२ बजे धनगढीबाट उडेको श्रीएयरको उडान नम्बर २२८ जहाज मौसम खराव भएका कारण काठमाडौंमा अवतरण गर्न सकेन। आकाशमा अढाइ घण्टासम्म उडेको जहाज काठमाडौंमा अवतरण गर्न नसकेपछि फर्केर ९ः३४ बजे भैरहवामा आपतकालीन अवतरण गरेको हो।

८० सिट क्षमताको जहाजमा दुई बच्चासहित ७७ जना यात्रु सवार थिए।

काठमाडौंको आकाश खुलेपछि धनगढीबाट जहाज उडेको श्रीएयरका धनगढी इन्चार्ज गजेन्द्र शाहीले बताए। तर, काठमाडौंमा जहाज अवतरण गर्ने क्रममा मौसम बिग्रिएपछि काठमाडौंको आकाशमा होल्ड गरेको र अन्तिममा भैरहवामा अवतरण गरिएको शाहीले बताए।

अढाइ घण्टासम्म जहाज सम्पर्कविहीन भएपछि जहाजमा रहेका यात्रुका आफन्तहरू आत्तिएका थिए। ५० मिनटमा काठमाडौंमा अवतरण हुनुपर्ने जहाज एक घण्टापछि पनि सम्पर्कविहीन भएपछि यात्रुका आफन्तहरूले तारन्तार श्री एयरलाइन्समा कल गरेका थिए।

धनगढीबाट उडेको जहाजले काठमाडौंको आकाशमा डेढ घण्टाभन्दा बढी फन्को लगाएको थियो। यात्रुहरूका अनुसार बिमानस्थलमा अवतरण गर्न जहाजका पांग्रा पनि खुलिसकेका थिए। कोटेश्वर नजिकबाट विमानस्थल देखिइसकेको थियो। तर, जहाजले धावनमार्गमा अवतरण नगरी अचानक ओभर सुट गरेको थियो।

त्यसपछि भने जहाजमा रहेका यात्रुबीच रुवावासी चल्यो। यात्रुहरू निकै आत्तिएका थिए। यात्रुले परिचारिकासँग जहाजमा खरावी आएको वा मौसम खरावका कारण अवतरण गर्न नसकिएको हो भन्ने विषयमा जानकारी लिन खोज्दा सही जवाफ नपाएको गुनासो गरेका छन्।

काठमाडौंमा अवतरण हुन नसकी फिर्ता भएको उक्त जहाज धनगढीबाट उडेको झण्डै अढाइ घण्टापछि भैरहवामा अवतरण भएपछि पनि जहाजमा रहेका यात्रुहरू रोइरहेका थिए। उनीहरू निकै डराएका थिए।