स्याटेलाइट तस्बिरबाट उत्तर कोरियाले सन् २०१८ मा बन्द गरेको परमाणु प्लान्ट धमाधम पुनर्निर्माण गरिरहेको देखिएको छ।
उत्तर कोरियाको उत्तर–पूर्वी क्षेत्रस्थित पङ्गी–रीमा रहेको परमाणु प्लान्ट पुनः सञ्चालनमा ल्याउन प्रयास भइरहेको देखिएको हो। तत्कालीन अमेरिकी राष्ट्रपति डोनाल्ड ट्रम्पसँगको वार्तापछि उत्तर कोरियाले उक्त परमाणु प्लान्ट बन्द गरेको थियो।
त्यसबाट उत्तर कोरिया परमाणु हतियारको परीक्षणमा पुनः जुटेको पाइएको छ। प्लान्टको पुनर्निर्माण केही दिनयता मात्र शुरु भएको स्याटेलाइट तस्बिरमा समेटिएका दृश्यले देखाएका छन्। नयाँ भवनको निर्माण, पुरानाको पुनर्निर्माण भइरहेको पाइएको छ।
‘जेम्स मार्टिन सेन्टर फर ननप्रोलिफेरेसन स्टडिज (सीएनएस)’का अनुसार हालै खिचिएका तस्बिरबाट पङ्गी–रीस्थित परमाणु प्लान्ट पुनः सञ्चालनको तयारी भइरहेको पाइएको हो। ती तस्बिरहरू गत शुक्रबार स्याटेलाइट इमेजिङ कम्पनी मेक्सारले खिचेको थियो।