काठमाडौँ । नेपाली कांग्रेसका महामन्त्री गगन थापाले प्रतिनिधिसभा विघटन हुने संकेत गरेका छन् । कांग्रेस निकट निजामती कर्मचारी युनियनको सम्मेलनलाई सम्बोधन गर्दै उनले यस्तो संकेत गरेका हुन् ।
एमालेले संसद अवरोध गरिरहने र संवादमा नआए आगामी मंसिरअगाडि नै संसदीय निर्वाचन हुने महामन्त्री थापाले बताए । उनले एमालेसँग वार्ता र संवाद भइरहेको समेत बताए ।
‘आम चुनाव मंसिरमा हुन्छ वा त्योभन्दा पहिला हुन्छ मलाई थाहा छैन्, संसद यसैगरी चल्दै गयो भने, संसद यसरी नै चल्न नदिने अवस्था रह्यो भने, संसदको उपहास गर्ने काम नेकपा एमालेले गरिरह्यो भने, यसको विकल्प हुन्छ,’ उनले भने, ‘हामीले छलफल गर्न आउनुस् भनिरहेका छौँ, उहाँहरु आउनु भएन भने त्योबेला संसद किन चलाइरहने भन्ने प्रश्न उठ्नसक्छ, त्यो अवस्थामा अगाडि नै चुनाव हुन पनि सक्छ ।’
महामन्त्री थापाले आगामी वैशाख ३० गते स्थानीय तहको निर्वाचन हुनेमा विश्वास व्यक्त गरे । उनले आगामी निर्वाचनमा कांग्रेस पहिलो पार्टी बनेर पाँच वर्ष सरकार चलाउने बताएका थिए ।