काठमाडौं– यस वर्षको राष्ट्रिय पोशाक दिवस पुष १६ गते पाटन दरवार क्षेत्र परिसरमा मनाईने भएको छ।
अघिल्ला बर्ष जनवरी १, पुष १७ गते पर्ने हुँदा राष्ट्रिय पोशाक दिवस पुष १७ गते मनाईने प्रचलन थियो तर यो बर्ष जनवरी १ नेपाली पात्रो अनुसार पुष १६ गते नै परेको हुँदा यो बर्ष पुष १६ गते सांस्कृतिक धरोहर बोकेको पाटन दरबार क्षेत्र परिसरमा ११ औं राष्ट्रिय पोशाक दिवस मनाईन लागेको संस्थापक अध्यक्ष राजानन्द माण्डव्यले बताए।
राजानन्द माण्डव्य जो बिगत लामो समयदेखि नेपाल र नेपालीको स्वाभिमान जोगाउनका निम्ति लागिपरिरहेका छन। कहिले आफ्नै कार्यक्रममा त कहिले अन्यत्र कार्यक्रममा अतिथि बनेर जाँदा होस् उनले हरेक कार्यक्रममा आफ्नो भनाई राख्दा छुटाउदैनन् “राष्ट्रिय पोशाक दौरासुरुवाल र ढाका टोपी बनाउनुपर्छ।” यहीँ नारासहित उनी एउटा युद्धमा होमिएका छन।
उनी आफू स्वयम् संस्थापक अध्यक्ष रहेको संस्था राष्ट्रिय धरोहर संरक्षण प्रतिष्ठान नेपाल ले २०७० पुष १७ गतेबाट हरेक बर्ष राष्ट्रिय पोशाक दिवस र २०७५ साल पुष १ गतेबाट हरेक बर्ष राष्ट्रिय झण्डा दिवसको कार्यक्रम आयोजना गर्दै आएको छ।
गत बर्ष १० औं पोशाक दिवस काठमाडौं स्थित पर्यटन बोर्डको हलमा भब्यताका साथ सम्पन्न भएको थियो। आयोजक राष्ट्रिय धरोहर संरक्षण प्रतिष्ठान नेपालले गत २०७८ सालदेखी हरेक राष्ट्रिय पोशाक दिवसको अवसरमा देशको सम्पदा, संस्कृति, धरोहर र ईतिहास मा योगदान दिने ब्याक्तित्वहरुलाई राष्ट्रिय धरोहर सम्मान समेत गर्दै आएको छ। जसअन्तर्गत २०७८ सालमा स्वर्गीय ईतिहासबिद सत्यमोहन जोशी, २०७९ सालमा ईतिहासबिद ज्ञानमणि नेपाललाई राष्ट्रिय धरोहर सम्मानद्वारा अभिनन्दन गरेको थियो।
यस वर्षको ११ औं राष्ट्रिय पोशाक दिवसमा तेस्रो राष्ट्रिय धरोहर सम्मानद्वारा २०५३ सालका मदन पुरस्कार बिजेता प्रा.डा दयाराम श्रेष्ठ सम्मानित हुँदैछन। कार्यक्रम बिहान ११:१५ बाट प्रारम्भ हुनेछ।