काठमाडौं- कैलालीको धनगढीमा जारी लिटल फ्लावर प्रिमियर लिग (एलपीएल)को आठौँ संस्करणअन्तर्गत आज भएका दुई खेलमा घोडाघोडी क्रिकेट एकेडेमी र कैलाली जिल्ला क्रिकेट क्लब विजयी भएका छन्।
आजको पहिलो खेलमा घोडाघोडी क्रिकेट एकेडेमीले लिटल फ्लावर स्कुललाई ४१ रनले पराजित गर्यो। घोडाघोडीले दिएको १२८ रनको लक्ष्य पछ्याएको लिटल फ्लावरले १६.५ ओभरमा ८६ रनमा सबै विकेट गुमायो। लिटल फ्लावरको लागि मनिष थापाले सर्वाधिक १७ रन बनाए। कृष्ण कार्कीले १५ तथा प्रतिक श्रेष्ठ र कौशल रुपाखेतीले समान ११ रनको योगदान दिए।
घोडाघोडीका स्पिनर अशोक धामी एक्लैले ५ विकेट लिँदै लिटल फ्लावरको इनिङ्स धरासायी बनाए। प्लेयर अफ द म्याच घोषित उनले ४ ओभरमा १८ रन खर्चिए। यस्तै, नरेश सुनारले २ तथा नवयुग बस्नेतले १ विकेट लिए ।
यसअघि टस जितेर ब्याटिङ गरेको घोडाघोडी क्रिकेट एकेडेमीले १९.५ ओभरमा सबै विकेट गुमाएर १२७ रन बनायो। घोडाघोडीको लागि नरेश सुनारले सर्वाधिक ३४ रन बनाए। विपिनबिक्रम शाहीले २४ तथा कृष कार्कीले २२ रन बनाए। लिटल फ्लावर स्कुलका दिनेश अधिकारीले सर्वाधिक ४ विकेट लिए, त्यस क्रममा ३.५ ओभरमा १७ रन खर्चिए। कप्तान कृष्ण कार्कीले ३, कौशल रुपाखेतीले २ तथा विपिन खत्रीले १ विकेट लिए।
यसैगरी, आजको दोस्रो खेलमा कैलाली जिल्ला क्रिकेट क्लबले खप्तड इन्डोर स्पोर्ट्स ट्रेनिङ सेन्टरलाई ३४ रनले पराजित गर्यो। कैलालीले दिएको १४० रनको लक्ष्य पछ्याएको खप्तडले १७.४ ओभरमा १०५ रन बनाउँदा सबै विकेट गुमायो। खप्तडको लागि प्रकाश पाण्डेले सर्वाधिक २६, अभिषेक थापाले २० तथा अरुण रानाले १२ रन बनाए। कैलालीका बलर नरेन साउदले ४ विकेट लिए, त्यस क्रममा ३ ओभरमा १५ रन खर्चिए। दीपक टमाटाले २ विकेट लिँदा शेर मल्ल, दीपक रोकाया, डबल ऐर र राहुल केसीले समान १–१ विकेट लिए।