काठमाडौं- काठमाडौं, बुढानिलकण्ठ नगरपालिका-१० कपन आकासेधाराबाट ६ ग्राम अवैध लागूऔषध ब्राउनसुगर जस्तो देखिने पदार्थ सहित सोही ठाउँ बस्ने २२ वर्षीय पासाङ छिरिङलाई सोमबार दिउँसो प्रहरीले पक्राउ गरेको छ । बिशेष सूचनाको आधारमा महानगरीय प्रहरी प्रभाग कपनबाट खटिएको प्रहरीले छिरिङलाई शंकास्पद अवस्थामा फेला पारी उनको कोठा तलासी गर्दा उक्त पदार्थ फेला पारी पक्राउ गरेको हो । साथै थप अनुसन्धानको क्रममा उक्त पदार्थ सोही ठाउँ बस्ने कञ्चनपुर भिमदत्त नगरपालिका घर भएका २७ वर्षीय खगेस खत्रीले राख्न दिएको भनी खुल्न आएपछि बुढानिलकण्ठ नगरपालिका-६ गोपिकृष्ण हल नजिकबाट उनलाई समेत प्रहरीले पक्राउ गरेको छ ।

कास्की, पोखरा महानगरपालिका-३२ मजुवाबाट करिब ४ केजी अवैध लागूऔषध गाँजा सहित सोही महानगरपालिका-२६ सुन्दरीडाँडा बस्ने १८ वर्षीय किशोरलाई सोमबार दिउँसो प्रहरीले पक्राउ गरेको छ । काठमाडौंबाट पोखरातर्फ आउँदै गरेको बा.४ ख १०८० नम्बरको हाईसलाई वडा प्रहरी कार्यालय गगनगौंडाबाट खटिएको प्रहरीले जाँच गर्ने क्रममा हाईसमा सवार उनलाई उक्त लागूऔषध सहित फेला पारी पक्राउ गरेको हो ।

कपिलवस्तु मायादेवी गाउँपालिका-४ ठाकुरापुरस्थित सडकबाट नियन्त्रित लागूऔषध स्पास्मो ५ सय ३६ ट्याब्लेट र नाइट्राभेट ९० ट्याब्लेट सहित कपिलवस्तु नगरपालिका-७ धरमपनियाँ बस्ने २८ वर्षीय अफ्तर अलीलाई सोमबार दिउँसो प्रहरीले पक्राउ गरेको छ । लु.३३ प ९३०६ नम्बरको मोटरसाइकललाई सिमा प्रहरी चौकी चाकरचौँडाबाट खटिएको प्रहरीले जाँच गर्ने क्रममा मोटरसाइकल चालक अलीलाई उक्त लागूऔषध सहित फेला पारी पक्राउ गरेको हो । बाँके, नेपालगंज उपमहानगरपालिका-.८ जोलाहान पुरुवाबाट करिब १९ ग्राम ५ सय २० मिलिग्राम अवैध लागूऔषध ब्राउनसुगर जस्तो देखिने पदार्थ सहित सोही ठाउँ बस्ने २५ वर्षीय मोहमद अली कवाडियालाई सोमबार दिउँसो प्रहरीले पक्राउ गरेको छ । जिल्ला प्रहरी कार्यालय बाँकेबाट खटिएको प्रहरीले उनलाई उक्त पदार्थ सहित फेला पारी पक्राउ गरेको हो ।