काठमाडौं– काठमाडौं महानगरपालिकाले आन्दोलनका नाममा विद्यालय बन्द गर्ने प्रधानाध्यापक र गयल हुने शिक्षकलाई कारबाही गर्ने चेतावनी दिएकाे छ।
महानगरले भोलिदेखि विद्यालय अनुगमन गर्ने विद्यालय बन्द गरिएको पाइएमा कारबाही गर्ने जनाएको हो।
मेयर बालेन शाहले शिक्षा विधेयकमा महानगरकाे पनि असहमती रहेकाे बताएका छन्।
‘संघीय तहले प्रस्तुत गर्नुपर्ने विधेयक संघीय संसद्मा दर्ता गर्नु नै संविधानको बर्खिलाप हो। संघीय सरकारले संघीय शिक्षा ऐन तर्जुमा गरी राष्ट्रिय शिक्षा नीति तथा मापदण्ड बनाउनुको साटो विद्यालय शिक्षा विधेयक ल्याउनु संवैधानिक प्रावधान विपरीत रहेकोले किमार्थ स्वीकार गर्न सकिँदैन। स्थानीय सरकारले प्रयोग गरिरहेको माध्यमिक शिक्षासम्मको विधायिकी र कार्यकारी अभ्यासबारे सम्मानित अदालतका फैसलाहरूबाट समेत नजिर स्थापित भइसकेको स्मरण गराउन चाहन्छौँ,’ उनले भनेका छन्।
तर यति भन्दै गर्दा शिक्षकले स्कुल बन्द गरेर पठन पाठनमा अबरोध गर्न नहुने उनले बताएका छन्। उनले पठनपाठनमा अबरोध पुर्याउनेहरुलाइ कानुन (संविधान)अनुसार कारबाही गरिने बताएका छन्।