महामन्त्री र वरिष्‍ठ नेतालाई
खुइल्याउने कार्यक्रम हेरियो
जनताले थाहा पाए
को कति पानीमा रहेछन्

उडाएका छन्
होच्याएका छन्
बेइज्‍जत गरेका छन्
जनता हाँसेका छन्
आफ्नै इज्‍जत, पार्टीको इज्‍जत
खुलेआम लिलाम भएको हेक्का छैन

यस्ताले गिल्ली उडाउनेले
केही गर्लान् भनेर
आशा गर्ने हामी मूर्ख फेरि
कुरा सुन्दै थाहा हुन्छ
कुनै हुत्ती छैन
कुनै सूत्र छैन
यिनीहरूसँग

सूत्र छन् त
केवल एकअर्कालाई होच्याउने
एकअर्कालाई खुइल्याउने
र भ्रष्‍टाचारमा रमाउने

सर्वमान्य फेरि हाई गर्दै
नाक कोट्याउँदै
चुर्रिंदै ठिक्क

आफू किन बोल्नुपर्‍यो
आफ्ना परिवार र
सिपहसालार छोडेका छन्
गाली गलौच गर्न
र तमासा देखाउन

अपराध र अपराधीको
हिमायत गरेको देख्दा
न्याय कुनामा लुकेर बसेको देखें

कुरेर बसेका छन् यी
सत्ताको रथ दौडाउन
आफ्नै नियम बनाएर
आफ्नै रेफ्री राखेर
देशको छातिमा बिना नियमको
फुटबल खेल्न