काठमाडौं- भक्तपुर चाँगुनारायण नगरपालिका-६ घुमाउनेबाट काठमाडौं बल्खु बस्ने २९ वर्षीय गौरव पाठक लगायत २ जनालाई ९० ग्राम अवैध लागऔषध गाँजा सहित शुक्रबार प्रहरीले पक्राउ गरेको छ । बागमती प्रदेश २-०२-०२३ प ५६८ नम्बरको स्कुटरलाई प्रहरीले जाँच गर्ने क्रममा स्कुटरमा सवार उनीहरुलाई उक्त परिमाणको लागूऔषध सहित फेला पारी पक्राउ गरेको हो । साथै महानगरीय प्रहरी परिसर भक्तपुरबाट खटिएको प्रहरीले थप अनुसन्धान गर्ने क्रममा चाँगुनारायण नगरपालिका-६ नगरकोट बस्ने ४७ वर्षीया मन कुमारी बस्नेतलाई ११ किलो अवैध लागूऔषध गाँजा सहित पक्राउ गरेको छ ।
कैलाली घोडाघोडी नगरपालिका-१ सिमतडी घर भई टिकापुर नगरपालिका-१ जमरापारीस्थित वर्कसप गरी बस्ने २६ वर्षीय उमेश चौधरीलाई ५ ग्राम ७ सय ६० मिलिग्राम अवैध लागूऔषध खैरो हेरोईन सहित बिहीबार दिउँसो प्रहरीले पक्राउ गरेको छ । चौधरीको वर्कसपमा अवैध लागूऔषध रहेको भन्ने बिशेष सूचनाको आधारमा ईलाका प्रहरी कार्यालय टिकापुरबाट खटिएको प्रहरीले जाँच गर्ने क्रममा उक्त लागूऔषध फेला पारी उनलाई पक्राउ गरेको हो ।
सुनसरी ईटहरी उपमहानगरपालिका-४ श्रमिक टोल डेरा गरी बस्ने चितवन भरतपुर महानगरपालिका-१० घर भएका ३० वर्षीय संजय लामालाई ९ ग्राम २० मिलिग्राम खैरो हेरोइन जस्तो देखिने पदार्थ सहित शुक्रबार दिउँसो प्रहरीले पक्राउ गरेको छ । लामाले आफ्नै कोठामा अवैध लागूऔषध बिक्री गरेको भन्ने सूचनाको आधारमा ईलाका प्रहरी कार्यालय ईटहरीबाट खटिएको प्रहरीले उनको कोठामा खानतलासी गर्दा उक्त लागूऔषध फेला पारी उनलाई पक्राउ गरेको हो ।
पर्सा वीरगंज महानगरपालिका-१६ रजतजयन्ती चोकबाट नियन्त्रित लागूऔषध नाईट्राभेट ७५ ट्याब्लेट, विनसिरेक्स १९ बोतल, कोडिवेल २५ बोतल र स्पास्कोर भोनप्लस ८ पिस सहित हेटौंडा उपमहानगरपालिका-५ सानोपोखरा बस्ने २५ वर्षीय संजय बललाई शनिबार दिउँसो प्रहरीले पक्राउ गरेको छ । ना.१४ प ९३१२ नम्बरको मोटरसाइकललाई लागूऔषध नियन्त्रण ब्यूरो शाखा कार्यालय वीरगंजबाट खटिएको प्रहरीले जाँच गर्ने क्रममा चालक बललाई उक्त लागूऔषध सहित फेला पारी पक्राउ गरेको हो ।