काठमाडाैं– नेकपा एमालेले कार्यकारी कमिटीमा लगाएको ७० वर्षे उमेर हद हटाएको छ। एमालेको जेठ १९ गते बसेको सचिवालय बैठकले दसौँ महाधिवेशनको विधान सम्मेलनले पारित गरेको कार्यकारिणी कमिटीमा लाग्ने उमेर हद हटाउने निर्णय गरेको हो।
एमालेले २०७८ असोजमा सम्पन्न विधान महाधिवेशनबाट ११ औं महाधिवेशनबाट लागु हुनेगरी ७० वर्षे उमेर हद लगाएको थियो।
एमालेको विधानको धारा ६४ मा सबै तहको कार्यकारी कमिटीको पदाधिकारी वा सदस्यमा निर्वाचित वा मनोनित हुन ७० वर्ष उमेर पुरा नभएको हुनुपर्ने व्यवस्था छ। त्यस्तै ७० वर्ष पूरा नहुँदै निर्वाचित वा मनोनित भएको व्यक्तिले अर्को महाधिवेशन/अधिवेशन नभएसम्म आफू निर्वाचित वा मनोनित पदमा रही जिम्मेवारी बहन गर्न बाधा नपुग्ने प्रावधान राखिएको छ।
गत चैतमा नेकपा (एकीकृत समाजवादी) परित्याग गरी एमाले फर्किएका तर ७० वर्ष उमेर काटिसकेका मुकुन्द न्यौपानेलाई जिम्मेवारी दिन विधान बाधक भएकाले उनलाई केन्द्रीय कमिटीमा ल्याउन विधान संशोधन गर्नुपरेको एमालेका नेताहरू बताएका छन्।
तर, ओलीइतरका नेताहरूले भने अध्यक्ष ओली र वरिष्ठ उपाध्यक्ष ईश्वर पोखरेलले न्यौपानेकाे नाममा आफूलाई सजिलो बनाउँन खाेजेकाे बताएका छन्। अध्यक्ष ओली पनि ७३ वर्ष लागिसकेका छन् भने पोखरेल ७० वर्ष पुग्नै लागेका छन्।