काठमाडौं– क्रिकेटर सन्दीप लामिछाने भोलि दक्षिण अफ्रिका जाने भएका छन्।

जिल्ला अदालत काठमाडौंले आगामी पेशी असार २९ गतेलाई सारेपछि नेपाल क्रिकेट संघ (क्यान) ले सन्दीपलाई विश्वकप छनोटको अभ्यास खेल्न दक्षिण अफ्रिका पठाउने भएको हो।

पेशी तोकिएको २१ दिनभित्र अदालतमा अनिवार्य उपस्थित हुनुपर्ने प्रावधानका कारण सन्दीप दक्षिण अफ्रिका जान पाएका थिएनन्।

सन्दीपका वकिलहरूले अर्को पेशी डेढ महिना पछाडि सार्न दिएकाे निवेदनलाई अदालतले स्वीकृत गरेपछि उनी दक्षिण अफ्रिका जान पाउने भएका हुन्।

सन्दीपले अब दक्षिण अफ्रिकामा हुने चारवटा अभ्यास म्याच र जिम्बाबेमा हुने विश्वकपको ग्लोबल क्वालिफायर खेल्न पाउने भएका हुन्।

नेपाल क्रिकेट संघले सन्दीपलाई भाेलि नै दक्षिण अफ्रिका पठाउने गरी तयारी गरिएको बताएकाे छ।

यसअघि गत मङ्गलवार राष्ट्रिय टोली नेपालबाट प्रस्थान गरिसकेको छ।