काठमाडौं- नेपाल पत्रकार महासंघले दलित पत्रकारको अवस्था र चुनौतीका विषयमा अन्तरक्रिया आयोजना गरेको छ ।
महासंघको केन्द्रीय दलित विभागको आयोजनामा भएको कार्यक्रममा राष्ट्रिय दलित आयोगका अध्यक्ष देवराज विश्वकर्माले दलित समुदाय लामो समयदेखि उत्पीडनमा रहेको उल्लेख गर्दै त्यसको मुक्तिका लागि अक्षरमार्फत अघि बढ्न पत्रकारहरूलाई आग्रह गरे । दलित वर्गको उत्थानका लागि सामथ्र्यको संघर्ष आवश्यक रहेको बताउँदै उनले त्यसमा पत्रकारहरूको महत्त्वपूर्ण भूमिका रहने उल्लेख गरे ।
सांसद अञ्जना विशंखेले दलित पत्रकारका समस्या समाधानका लागि सबै पत्रकार एकजुट भएर अघि बढ्न आग्रह गरिन् ।
महासंघका वरिष्ठ उपाध्यक्ष रमेश विष्टले दलित पत्रकारको समस्या पहिचान गर्दै त्यसको समाधानका लागि महासंघ तयार रहेको बताए ।
महासंघका कोषाध्यक्ष कलेन्द्र सेजुवालले दलित पत्रकारको समस्या पहिचान गरी समस्या समाधान गर्न सम्बन्धित संघसंस्थासँग अन्तरक्रियामार्फत अघि बढ्ने बताए ।
महासंघका पूर्वकेन्द्रीय सदस्य प्रकाशचन्द्र परियारले सञ्चारगृहमा दलित पत्रकारको समानुपातिक सहभागिता हुनुपर्ने औँल्याए ।
पत्रकार बाबुराम विश्वकर्माले दलितमाथि हुने गरेका विभेद र हिंसाका घटनालाई राज्यले गम्भीर मुद्दाका रूपमा नलिने गरेको बताए ।
राष्ट्रिय दलित पत्रकार संघका महासचिव लक्ष्मण दर्नालले सञ्चारको क्षेत्रमा इतिहासमा कटुवाल प्रथादेखि हालसम्म दलितहरूको महत्वपूर्ण भूमिका हुँदा पनि त्यसको कदर हुन नसकेको बताए ।
महासंघ केन्द्रीय सदस्य प्रकाश धौलाकोटीले दलित पत्रकारको समस्या पहिचान गरी समाधनका बारेमा कार्यक्रमको आयोजना गरिएको बताए ।