काठमाडौं- नेकपा (एकीकृत समाजवादी) अध्यक्ष माधवकुमार नेपाल उपचारपछि डिस्चार्ज भएलगत्तै सत्तारुढ गठबन्धन मन्त्रिपरिषद् विस्तारको तयारीमा जुटेको छ ।
मंगलबार भएको सत्ता गठबन्धनका पाँच दलका शीर्ष नेताको बैठकमा मन्त्रालय बाँडफाँटबारे ‘न्यारो डाउन’ भएको छ । सम्भवतः मंगलबार नै मन्त्रालय बाँडफाटको विषय टुंगिने स्रोतले उल्लेख गरेको छ ।
बैठकमा प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल ’प्रचण्ड’, एकीकृत समाजवादी अध्यक्ष नेपाल र जसपा अध्यक्ष उपेन्द्र यादव सहभागी थिए । कुन पार्टीले कुन–कुन मन्त्रालय लिने भन्नेबारे स्पष्ट नखुलाइए पनि बाँडफाँट चाँडो टुंग्याएर मन्त्रिपरिषद् विस्तार गरिहाल्ने सहमति भएको स्रोतले जनाएको छ ।
‘मन्त्रालय बाँडफाँटमा अब ठूलो विवाद छैन, भोलिसम्ममा मन्त्रिपरिषद् विस्तार गर्नेबारे शीर्ष नेताहरूबीच सहमति जुटेको छ,’ सत्ता गठबन्धनका एक नेताले भने । हालसम्म कांग्रेसले गृह, परराष्ट्र र कानून, न्याय तथा संसदीय मामिला मन्त्रालय लिएको छ ।
यस्तै, माओवादी केन्द्रले अर्थ र ऊर्जा, सिँचाइ तथा जलस्रोत मन्त्रालय लिएको छ । समाजवादी केन्द्र र जसपा मन्त्रिपरिषदमा सामेल हुन बाँकी छ । राष्ट्रिय जनमोर्चाले सरकारबाहिरै रहेर समर्थन कायम राख्ने बताएको छ । ‘सम्भवतः बुधबार मन्त्रिपरिषद्ले पूर्णता पाउँछ,’ सत्ता गठबन्धनका ती नेताले भने ।