काठमाडौं- राष्ट्रपति विद्यादेवी भण्डारीले राजनीतिक दलसम्बन्धी अध्यादेश खारेज गरेकी छन् ।

मन्त्रिपरिषद्को सोमबारको निर्णय तथा प्रधानमन्त्रीको सिफारिसमा ‘राजनीतिक दलसम्बन्धी (दोस्रो संशोधन) अध्यादेश, २०७८’ खारेज भएको राष्ट्रपतिको कार्यालयले जनाएको छ।

सोमबारको मन्त्रिपरिषद् बैठकले अध्यादेश फिर्ता लिने निर्णय गर्दै राष्ट्रपतिसमक्ष सिफारिस गरेको थियो । गत १ भदौमा २० प्रतिशत सांसद वा दलको केन्द्रीय सदस्यहरूले चाहेमा दल विभाजन गर्न सक्नेगरी अध्यादेश ल्याएको थियो।

अध्यादेश आएलगत्तै माधवकुमार नेपालको नेतृत्वमा एमाले विभाजन भएर नेकपा (एकीकृत समाजवादी) गठन भएको थियो । यस्तै, दलविहीन बनेको तत्कालीन जसपा अध्यक्ष महन्थ ठाकुरको नेतृत्वमा लोकतान्त्रिक समाजवादी पार्टी गठन भएको थियो ।