काठमाडौं- संघीय संसदमा एमाले सांसदहरूले जारी राखेको अवरोध हटाउन सभामुख अग्निप्रसाद सापकोटाले पहलकदमी लिएका छन् ।
सभामुख सापकोटाले सोमबारका लागि संघीय संसदमा उपस्थित सबै दलका शीर्ष नेताहरूको बैठक बोलाएका छन् । २३ भदौदेखि सुरु भएको संघीय संसदको नवौँ अधिवेशनमा एमाले सांसदहरूले निरन्तर अवरोध गर्दै आएका छन् ।
नेकपा (एकीकृत समाजवादी)का अध्यक्ष माधवकुमार नेपाललगायत १४ सांसदको पद खारेज हुनुपर्ने एमाले सांसदहरूको माग रहँदै आएको छ । यस्तै, एमाले विभाजनका लागि सभामुख सापकोटाको समेत भूमिका देखिएको उनीहरूको आरोप छ ।
संसदको गतिरोध अन्त्यका लागि सोमबार साढे दुई बजेका लागि शीर्ष नेताहरूको बैठक बोलाइएको हो ।
आइतबार पनि सभामुख सापकोटाले एमाले प्रमुख सचेतक विशाल भट्टराई, सचेतक शान्ता चौधरीलगायतसँग गतिरोध अन्त्य गर्नेबारे छलफल गरेका थिए । छलफलमा न्याय, कानून तथा संसदीय मामिला मन्त्री ज्ञानेन्द्रबहादुर कार्की पनि सहभागी थिए ।