जाकार्ता- इन्डोनेसियाको सशस्त्र पृथकतावादी संगठनले न्युजिल्यान्डका एक पाइलटलाई नियन्त्रणमा लिएर सरकारसँग बार्गेनिङ तीव्र बनाएको छ।
फिलिप मेहटेन्स नामक पाइलट गत फेब्रुअरीदेखि पृथकतावादीहरूको कब्जामा छन्। उनले उडाइरहेको जहाज इन्डोनेसियाको दुर्गम पपुवास्थित पहाडी इलाकामा पाँचजना यात्री लिन अवतरण गराइएको थियो। त्यसलगत्तै वेस्ट पपुवा नेसनल लिबरेसन आर्मी नामक संगठनले उनलाई कब्जामा लिएको थियो।
‘उनी हामीसँगै छन्। र, इन्डोनेसियाको सरकारले उनको खोजीमा सेना र प्रहरी नपठाई हामीसँग नेगोसिएसनमा बस्नुपर्छ,’ संगठनका प्रवक्ता सेब्बी स्यामबोमले बीबीसीसँग भने।
उक्त क्षेत्रलाई स्वतन्त्र मुलुक बनाउनुपर्ने मागसहित यो संगठन सशस्त्र युद्धमा छ। र, पाइलटको रिहाइमा पनि सोही माग पूरा हुनुपर्ने शर्त यो संगठनको छ।
यसअघि सन् १९६१ मा पपुवाले आफूलाई स्वतन्त्र राष्ट्र घोषणा गरेको थियो। त्यसको दुई वर्षपछि इन्डोनेसियाले उक्त क्षेत्र कब्जामा लिएको थियो। यो क्षेत्र प्राकृतिक सम्पदाले भरिपूर्ण मानिन्छ।
उक्त सानो जहाज इन्डोनेसियाकै सुसी एयरको हो। मध्य पपुवाबाट पाँचजना यात्री लिन यो जहाज त्यो क्षेत्रमा पुगेको थियो।